पोखरा । कास्की जिल्ला अदालतका न्यायाधीश नवराज दाहालले स्थानीय तहका विवाद न्यायिक समिति मार्फत समाधान हुँदा मुद्दाको भार घटेको बताएका छन् ।

पोखरा महानगरपालिका न्यायिक समितिको आयोजनामा सञ्चालित मेलमिलापकर्ताका लागि सञ्चालित पुुनर्ताजगी तालिमको समापन गर्दै उनले सो कुरा बताएका हुन् । उनले महानगरको न्यायिक समितिको सक्रियताले विवाद समाधानमा सहजता भएको र अदालतमा मुद्दाको चाप घटेको बताए ।

विवाद समाधानमा महानगर न्यायिक समितिले गरिहेको काम राम्रो रहेको बताउँदै देशभरमै उत्कृष्ट बनेकाले यसलाई निरन्तरता दिन उनको सुझाव थियो । उनले विवाद समाधानमा मेलमिलापकर्ताको भूमिका महत्वपूर्ण रहने भएकाले पुनर्ताजगी तालिमले सहजता प्रदान गर्ने विश्वास व्यक्त गरे ।

न्यायिक समिति सदस्य कालिदास पोखरेलले टुट्न लागेको सम्बन्धलाई मेलमिलापको धागोले सिलाउने काम मेलमिलापकर्ताले गरेको बताए । मेलमिलापकर्ताद्वय सविता भण्डारी, सुदीप प्रधानांगले तालिमले मेलमिलापमा सहजता प्रदान गरेको र सिकेको विषयलाई व्यवहारमा कार्यान्वयन गर्ने प्रतिबद्धता ब्यक्त गरे ।

पोखरा महानगरका १ देखि १८ वडाका मेलमिलापकर्ताले भाग लिएको तालिम ३ दिनसम्म चलेको थियो ।

प्रशिक्षार्थीलाई न्यायाधीश दाहाल, पोखरा महानगरपालिका कावा प्रमुख मञ्जुदेवी गुरुङ, न्यायिक समिति सदस्यद्वय कालिदास पोखरेल र रजनी परियारले प्रमाणपत्र वितरण गरेका हुन् ।