पोखरा । पोखराको एक सहकारीका प्रबन्धक आइतबार साँझ झुन्डिएको अवस्थामा भेटिएका छन् । पोखराकै डल्फिन वचत तथा ऋण सहकारीका प्रबन्धक ३८ वर्षे लेखुराम खाती झुन्डिएको अवस्थामा भेटिएको कास्की प्रहरीले जनाएको छ ।

पोखराको पुरानो बसपार्क नजिकै शिवटोलस्थित घरमा झुन्डिएको अवस्थामा देखेपछि परिवार र छिमेकीले प्रहरीमा खबर गरेका थिए । पछिल्ला दिनमा आर्थिक मन्दी र सञ्चालकको दबाबका कारण पोखरा मात्र होइन मुलुकभरका सहकारी समस्यमा छन् । लेखुरामले मृत्युको बाटो रोज्नुलाई पनि यसैसँग जोडिएको छ ।

प्रहरीले उनको खल्तीबाट ऋणीहरुलाई तिर्नुपर्ने रकमको सूची फेला पारेको छ । आइतबार दिउँसो नै सहकारीको सञ्चालक समितिको बैठक बसेको थियो । अफिसबाट फर्केपछि उनी साँझपख झुन्डिएको अवस्थामा फेला परे । जतिबेला उनको मृत्यु भइसकेको थिया । खातीले गत साउनमै सहकारीबाट राजीनामा दिए पनि सञ्चालक समतिले स्वीकृत नगरेको पाइएको छ ।

फसेको ऋण उठाएपछि मात्र राजीनामा स्वीकृत गर्ने दबाब उनले झेल्दै आएका थिए ।