पोखरा । पोखरा । गण्डकी प्रदेश स्वास्थ्य मन्त्रालयको सचिवमा विनोदबिन्दु शर्माले जिम्मेवारी पाएका छन् । मंगलबार साँझ बसेको मन्त्रिपरिषदको बैठकले उनलाई स्वास्थ सचिवको जिम्मेवारी तोकेको हो ।

यसअघि पनि स्वास्थ्य सचिव भए काम गरिसकेका उनी हाल मुख्यमन्त्री तथा मन्त्रिपरिषद कार्यालयमा थिए । प्रदेश सचिवको नियुक्ति र सरुवामा केन्द्र सरकारकै तजबिजी भएका कारण स्वास्थ्य सचिवमा डा. श्रीराम तिवारी आएपछि शर्मा जिम्मेवारविहीन थिए । डा. तिवारीपछि स्वास्थ्यमा सचिव डा. विश्ववन्धु बगाले आएका थिए । उनी अध्ययनका लागि विदेश गएपछि उक्त पद रिक्त थियो ।

मुख्यमन्त्री तथा मन्त्रिपरिषदको कार्यालयमा आउँदै हाजिर गर्दै फर्कने डा. शर्माको दैनिक बनेको थियो । उनी ११ तहका कर्मचारी अर्थात् सहसचिव हुन् । १० औं तहबाट बढुवा भएपछि उनले समायोजनमा प्रदेश रोजेका थिए । बढुवा अघि उनी प्रदेश स्वासथ्य निर्देशनालयमा निर्देशक थिए ।

कोभिड महामारी नियन्त्रणका बेलामा उनले उत्कृष्ट काम गरेका थिए । उनी आजै हाजिर हुने भएकाले मन्त्रालयमा कर्मचारीहरु त्यसैको तयारीमा जुटेका छन् ।
गण्डकी प्रदेश सरकारले ल्याएको प्रदेश निजामती सेवा अध्यादेशमा प्रदेश सचिवको प्रबन्ध प्रदेशबाटै हुने व्यवस्था गरिएको छ । उक्त अध्यादेश प्रतिस्थापन विधेयकका रुपमा सदनमा पेस भइसकेको छ ।