फरक र नयाँपन दिने गरी महोत्सव गर्दै छौं : पवन प्रजापति

आदर्श समाज सम्वाददाता
कार्तिक ३०, २०७९
Pawan

पवनकुमार प्रजापति, अध्यक्ष, पोखरा उद्योग वाणिज्य संघ

पोखरा । पोखरा उद्योग वाणिज्य संघका अध्यक्ष पवनकुमार प्रजापतिले यसपटक संघले फरक र नयाँ ढंगले राष्ट्रिय औद्योगिक व्यापार मेला २०७९ आयोजना गर्न लागेको जानकारी दिएका छन् । आदर्श समाज राष्ट्रिय दैनिकसँग कुरा गर्दै प्रजापतिले कोरोनाका कारण लगातार तीन वर्ष स्थगित भएको महोत्सवलाई यसपटक उद्यमशिलतासँग जोड्ने गरी प्रभावकारी ढंगले आयोजना गर्न लागिएको बताए ।

आसन्न संघीय र प्रदेशसभा चुनावका कारण मेलाको कार्यक्रम अगाडि बढाउने कार्य केही प्रभावित भए पनि विभिन्न उपसमितिहरु गठन गरेर काम अगाडि बढिसकेको उनले सुनाए । आगामी मंसीर १६ देखि २५ गतेसम्म नयाँबजार स्थित प्रदर्शनी केन्द्रमा आयोजना हुने महोत्सवमा प्रवेश गरेपछि उद्योगी वा व्यवसायी बन्न सघाउ पुग्ने गरी वातावरण तयार गरिने उनले बताए ।

स्वरोजगार हुन सघाउ पुग्ने गरी इच्छुकहरुका लागि महोत्सवस्थलमा नै एक हप्ते वा सो भन्दा लामो तालिमहरु पनि यसअन्तर्गत आयोजना गरिने र यसका लागि के कस्ता तालिम गर्ने र कसरी सहभागी हुने भन्ने विषय महोत्सव अघि नै सार्वजनिक गरिने पनि उनले जानकारी दिए । मेला पनि अवलोकन गर्नुस्, तालिम पनि लिनुस् र उद्यमी पनि बन्नुस् भन्ने आग्रहसहित मेला अगाडि बढाउन लागिएको उनले स्पष्ट पारे । ‘त्यसकारण पनि पोखरेली र अन्य नेपालीले यो मेला अवलोकन गर्न जरुरी छ,’ उनले भने, ‘पोखरा र वरपरको पर्यटन मात्र नभई स्वास्थ्य र कृषिको पाटोलाई समेत राम्रोसँग समेटेर महोत्सव गर्दै छौं ।’

कोरोनाका कारण सिंगो उद्योग व्यापार जगत आहात भएका कारण पनि यो पटक महोत्सवलाई साथ दिन उनले सबैसँग आग्रह गरे । महोत्सवमा यस क्षेत्रका पर्यटन व्यवसायी, पुराना व्यवसायी र विज्ञहरु विच आपसमा ‘टक सो’ समेत आयोजना गरिने अध्यक्ष प्रजापतिले बताए । अबको दिनमा उद्योगी व्यवसायी, पोखरा उद्योग वाणिज्य संघ, सिंगो पोखरा र सरकार कसरी अगाडि बढ्नुपर्छ भन्ने विषयलाई उक्त ‘टक सो’ ले समेट्ने जानकारी उनले दिए ।

घरमा नै बसेर उद्यमी बन्न सकिने खालका कार्यक्रम पनि महोत्सवमा समेटिने र स्थानीय कृषि र हस्तकला सम्बन्धी उत्पादनलाई प्रथामिकता दिइने योजना रहेको उनले बताए । मेला खासगरी पोखरेली र नेपाली पन झल्कने किसिमले नितान्त व्यवसायी र उद्योगीलाई हित पुग्ने गरी संचालन गर्न लागिएको अध्यक्ष प्रजापतीले बताए ।

उद्योगी व्यवसायीले महोत्सवलाई सफल पार्न सघाउनुपर्ने र केही लिएर जानुपर्ने उनले बताए । संघले पनि केही दिने गरी महोत्सव अगाडि बढाउन चाहेको भनाई उनको थियो । पाकिस्तान, भारत र वंगलादेशबाट समेत उद्योगी व्यवसायी आउने गरी महोत्सवको तयारी अगाडि बढाइएको संघले जनाएको छ । महोत्सवका लागि गण्डकी प्रदेश सरकारका मुख्यमन्त्रीसँग पनि भेट गरेर कोरोनापछि व्यवसाय प्रवद्र्धन हुने गरी महोत्सव आयोजना गर्न लागिएको आफूहरुले जानकारी गराइसकेको उनले बताए । पोखरा महानगरका प्रमुखसँग पनि राम्रै तरिकाले समन्वय भएको र उनीबाट राम्रो रेस्पोन्स पाइएको अध्यक्ष प्रजापतिले जानकारी गराए ।

फरक प्रसंग जोड्दै उनले कोरोनापछि व्यपार व्यवसाय केही राम्रो हुने अवस्थामा हुँदा बैंक तथा वित्तीय संस्थाले कर्जाको व्याजदर सात प्रतिशत बाट एक्कासी १७ प्रतिशत पुर्याउँदा उद्योगी व्यवसायी मारमा परेकोे बताए । ‘यो भनेको अब व्यापार व्यवसाय नगर भन्ने खालको अवस्था हो ।’ उनले भने, ‘१४/१५ प्रतिशत ब्याज बैंकले नै दिने भएपछि किन उद्योग व्यापार गर्नुपर्यो भन्ने खालको वातावरण भएको छ ।’ उद्योग व्यापार गरेर पाँच प्रतिशत नाफा लिन पनि गाह्रो हुने अवस्था रहेको र खासमा क्रेताहरु र नाफा पनि नभएको दाबी उनले गरे ।

तर पनि नेपाल उद्योग वाणिज्य महासंघले आग्रह गरेका कारण उद्योगी व्यवसायीले महंगो ब्याजविरुद्धको आन्दोलन चुनावसम्मका लागि स्थगित गरिएको र त्यसपछि पनि ब्याजदर सहज नभए गर या मर भन्ने हिसावले आन्दोलनले निरन्तरता पाउने उनले बताए । कोही बाँच्ने र कोही मर्ने भन्ने हुँदैन, बैंक पनि बाँच्नुपर्यो, उद्योगी व्यवसायी र सर्वसाधरण पनि बाँच्नुपर्यो भन्ने कुुरा उनको छ । उद्योगी व्यवसायी र बैंकर एउटै व्यक्ति हुँदा पनि तरलता समस्या सिर्जना भएको भन्ने भनाईमा उनले बैंकिङ क्षेत्रमा लगानी गर्ने व्यवसायीको संख्या १० प्रतिशत पनि नभएको र सबैलाई एउटै डालोमा हालेर हेर्न नमिल्ने बताए ।

आफ्नो टिम निर्वाचित भएलगत्तै दशैं आएको र ब्याजदरको प्रेसर परेका कारण काम अगाडि बढाउन असहज भए पनि आफ्नो चुनावी अजेण्डा समेट्दै व्यवासायीको तथ्यांक संकलनका लागि सुदीप प्रधानाङ्गको संयोजकत्वमा टिम बनाएर काम अगाडि बढाइएको उनले सुनाए । संघको पुरानो भवन भएको ठाउँमा मेलाको केही बचत रकम र सरकारको आर्थिक सहयोग परिचालन गरी बहुउद्देश्यीय भवन बनाउने, पोखरा र गण्डकी प्रदेशकै प्रतिनिधित्व हुने गरी पर्यटन क्षेत्रसँग समन्वय गर्दै कोशेली घर निर्माण गर्ने, यवासयीको विमा योजनालाई अगाडि बढाउने र विविध तालिम संचालन गर्दै आयात प्रतिस्थापन गर्ने गरी आफू र आफ्नो टिम अगाडि बढीसकेको उनले जानकारी दिए ।

Related News

सम्बन्धित समाचार

hero news full width