पोखरा ।  फ्रेन्चाइज क्रिकेट प्रतियोगिता नेपाल टी ट्वान्टी लिगको सहभागी टिम पोखरा एभेन्जर्सले सन्दीप पाटिललाई मेन्टरको रुपमा सार्वजनिक गरेको छ । मंगलबार औपचारिक कार्यक्रमको आयोजना गरेर पोखराले भारतीय टिमका पूर्व खेलाडी पाटिललाई मेन्टर नियुक्त गरेको हो ।

भारतले सन् १९८३ मा पहिलो पटक विश्वकपको उपाधि हासिल गर्दा पाटिल टिमका मुख्य सदस्य रहेका थिए । मेन्टर सार्वजनिक कार्यक्रममा पाटिलले नेपाल टी ट्वान्टी लिग युवा क्रिकेटरका लागि महत्वपूर्ण प्रतियोगिता बन्ने उल्लेख गरेका छन् । उनले फ्रेन्चाइजको आयोजनाबाट क्रिकेट व्यवसायिक मात्र बन्ने नभएर युवा खेलाडीको विकासमा समेत यसले सहयोग पुयाउने बताए । कार्यक्रममा पोखरा एभेन्जर्सको लोगो समेत सार्वजनिक गरिएको छ । पोखरा एभेन्जर्सलाई नेपाली ब्राण्ड केटीएम सिटीले अपेरियल पार्टनरको रुपमा मुख्य प्रायोजन गर्नेछ ।

टिमलाई आवश्यक पर्ने सम्पूर्ण किट केटीएम सिटीले उपलब्ध गराउने छ । प्रायोजन सम्बन्धि सम्झौतामा टिमका अध्यक्ष पोस्टराज ज्ञवाली र केटीएम सिटीका प्रमुख कार्यकारी अधिकृत निमा नोर्बु शेर्पाले हस्ताक्षर गरेका छन् । पोखराको मार्की खेलाडीमा आसिफ शेख छन् । पोखरा एभेन्जर्स, लुम्बिनी हेल्थ केयर ग्रुप स्वामित्वको फ्रेन्चाइज क्रिकेट टिम हो । यसको मुख्य प्रबद्र्धकमा पोस्टराज ज्ञवाली र सुबोध त्रिपाठी रहेका छन् । कार्यक्रममा पोखराका अध्यक्ष पोस्टराज ज्ञवालीले क्रिकेट विकासमा सहयोग गर्न आफुहरु टी ट्वान्टी लिगमा आबद्ध भएको बताए । टिमका निर्देशक सुबोध त्रिपाठीले खेलाडीको व्यवसायिक विकास गर्ने स्वच्छ भावनाले क्रिकेटमा हात हालेको उल्लेख गरे