पोखरा । पर्वतको पैयुँ गाउँपालिका–६ सरौंखोलास्थित डाँडाकाहुँका आगलागी पीडितलाई राहत वितरण गरिएको छ ।

गण्डकी प्रदेश उद्योग, पर्यटन, वन तथा वातावरण मन्त्री विकास लम्सालले शनिबार प्रदेश सरकारतर्फबाट तत्कालका लागि पीडितलाई प्रतिघर १० हजार रुपैयाँ, टेन्ट हाउस, त्रिपाल लगायत सामग्री प्रदान गरे ।

मन्त्री लम्सालले थप सहयोगका लागि आफूले पहल गर्ने प्रतिबद्धता जनाए । गर्मी बढिरहेको तथा हुरी बतास चल्न सुरु भएको यस समयमा विगत केही दिनदेखि प्रदेशका वनजंगलमा डढेलो तीव्र रुपमा फैलिएकोले सजग हुन उनले आग्रह गरे ।

शुक्रबार दिउँसो जंगलमा लागेको डढेलो डाँडाकाहुँको बस्तीमा पस्दा ५ घर र १२ गोठ जलेर नष्ट भएको थियो । आगलागीबाट स्थानीय शेरबहादुर गौतम, नमप्रसाद सापकोटा, रेशमलाल गौतम, रेशमलाल सापकोटा र जयकला सापकोटाका घर जलेका छन् । स्थानीय खड्कप्रसाद गौतम, एकनारायण गौतम, चोलाकान्त सापकोटा, छविलाल गौतम, उमेश गौतमको घरमा समेत आगलागीले क्षति पुर्‍याएको छ । १२ गोठ जलेको र भैंसी, गोरु र बाख्रासमेत मरेको प्रहरीले जनाएको छ ।