दमौली । पहाडकी रानी बन्दीपुर, त्यही सुन्दर ठाउँ जान पुग्नुपर्ने ठाउँ हो पृथ्वी राजमार्गस्थित डुम्रे बजार । बजार क्षेत्रका फुटपाथमा सामान राखेर व्यवसाय गर्नेको लस्कर । सवारी साधन पनि जथाभावी पार्किङमा छन् । बजारको मुख्य चोकबाट सडकपेटीमा पसल तथा विभिन्न व्यवसाय सञ्चालन गर्ने देखिन्छन् । सडकको पेटी अतिक्रम गरी स्थानीयले व्यवसाय सञ्चालन गर्न थालेपछि पैदल यात्री भने जोखिमकै यात्रा गरी गन्तव्यतर्फ लाग्नुुपर्ने बाध्यता छ । सडक क्षेत्र अस्तव्यस्त र जोखिमयुक्त भइरहेको छ ।

सडकपेटी अतिक्रमण भएपछि पैदलयात्री भने मूल सडकमै हिँडिरहेका छन् । व्यक्तिगत फाइदाका लागि बजारको स्वरुप बिग्रिने र पैदलयात्रीलाई जोखिम हुने गरी सडकपेटी अतिक्रमण गर्दा पनि बन्दीपुर गाँउपालिकाले बजार व्यवस्थापनमा कुनै चासो नदेखाएको स्थानीय रामकृष्ण श्रेष्ठले बताए । उनले भने, ‘बजार व्यवस्थापनका लागि स्थानीय सरकारले केही पनि गर्न सकेको उनले आरोप लगाए ।

१/२ दिन अनुगमन हुन्छ, फेरि जस्ताको त्यस्तै । नालामाथि स्ल्याब लगाएर बनाइएको सडकपेटीमा व्यापारीले व्यावसायिक सामग्री थुपारेपछि राजमार्गमा पैदलयात्रीलाई सवारी साधनले ठक्कर दिने पो हो कि भन्ने चिन्तामात्रै भइरहने स्थानीय रमेश रिजालले बताए । उनले भने,‘सडकपेटीमा व्यवसाय गरेपछि पैदल यात्रीलाई हिँड्न गाह्रो भएको छ । व्यवस्थापनमा कसैले पनि चासो दिएका छैनन् । ’

बन्दीपुर गाउँपालिकाका अध्यक्ष पूर्णसिं थापा पटक पटक अनुगमन गरी सम्झाउँदा पनि नटेरेको बताए । उनले भने, ‘जथाभावी व्यवसाय गर्नेका कारण बजार अस्तव्यस्त भएको छ । हामीले पटक पटक अनुगमन गरी कारबाहीसमेत गरेका छौं ।’

गाँउपालिकाले सवारी साधन पार्किङ गर्न ठाउँ छुट्याए पनि जथाभावी पार्किङ गर्ने गरेको अध्यक्ष थापाको भनाइ छ । उनले भने, ‘सबैसँग समन्वय गरी सवारी साधन पार्किङको लागि ठाउँ बनाइएको छ । तर कसैले निर्णयको कार्यान्वयन गर्दैनन् ।’ देशकै पर्यटकीय गन्तव्यको रुपमा चिनिने बन्दीपुर जानलाई डुम्रे बजार हँुदै जानुपर्छ । अस्तव्यस्त रहेको डुम्रे बजारको कारण पर्यटकलाई राम्रो सन्देश दिन सकिरहेको छैन ।