पोखरा । पोखरा रंगशालामा पोखरा विश्वविद्यालय क्रिकेट क्लबको आयोजनामा पोखरा विश्वविद्यालय क्रिकेट लिग सिजन ४ हुने भएको छ ।

प्रतियोगिता चैत्र ९ देखि १७ गतेसम्म सञ्चालन हुने बिहीबार पत्रकार सम्मेलन गरी आयोजकले जानकारी दिएको छ । प्रतियोगिताबारे जानकारी दिँदै क्लबका अध्यक्ष प्रकाश खनालले पोखरा विश्वविद्यालय विभिन्न आंगिक क्यापसमा अध्ययनरत विद्यार्थीको ८ टिम प्रतियोगितामा सहभागिता जनाउने बताए ।

प्रतियोगितामा गोरखाली ब्लास्टर्स, पियु राइनोज, स्टिल्थ सिक्सर्स, मिथिलाञ्चल वारियर्स, फारबेस्ट टाइगर्स, पियु रेड वारियर्स, अन्नपूर्ण किङ ११ र गण्डकी स्टाइकर्स रहनेछ । हरेक टिममा २/२ जना राष्ट्रिय टिमका खेलाडी अनुबन्ध भइसकेको आयोजकले जनाएको छ ।

प्रतियोगितामा उपाधि विजेता टिमले नगद १ लाख २५ हजार र उपविजेताले ७० हजारका साथमा ट्रफी प्राप्त गर्ने आयोजकले जनाएको छ । म्यान अफ दि सिरिजलाई नगद ५ हजार, बेष्ट बलरलाई नगद २ हजार ५ सय, बेस्ट बलरलाई २ हजार ५ सय र म्यान अफ दी म्याच हुने खेलाडीलाई नगद १ हजारका साथमा ट्रफी र मेडल प्रदान गरिने आयोजकले जनाएको छ । प्रतियोगिताका लागि करिब २० लाख खर्च हुने आयोजकको अनुमान छ ।