लमजुङ । लीलबहादुर स्मृति कप फुटबल प्रतियोगिताको उपाधि सराँतेपोखरी युवा क्लब बेंसीसहरको पोल्टामा परेको छ । सुन्दरबजार फुटबल क्लबलाई सराँतेपोखरीले टाइब्रेकरमा ४ का विरुद्ध ५ गोल गर्दै उपाधि जितेको हो । पुरस्कार राशि १ लाख रुपैयाँको रहेको छ ।

सेमिफाइनल खेलमा सराँतेपोखरी युवा क्लबले दुराडाँडाको च्यानपाटा युवा क्लब सुन्दरबजारलाई पराजित गर्दै फाइनलमा प्रवेश गरेको थियो । त्यस्तै उपविजेता सुन्दरबजार फुटबल क्लबले उदीपुरलाई हराउँदै फाइनलमा प्रवेश गरेको थियो ।

सुन्दरबजार फुटबल क्लबका आशीष गुरुङ उत्कृष्ट खेलाडी घोषित भए । खेल अवधिभर १२ गोल गरेका सुन्दरबजार फुटबल क्लबकै इन्द्र दुरा सर्वाधिक गोलकर्ता घोषित भए । उदीपुरस्थित नेपाली सेनाको श्रीजंग गणको समूह अनुशासित टिम घोषित भएको आयोजक ओम सिद्धार्थ युवा क्लबका अध्यक्ष हिरासंह गुरुङले बताए । ९ दिनसम्म चलेको प्रतियोगिता लक्ष्य अनुसार सफल भएको आयोजक समिति संयोजक सन्तोष गुरुङले बताए ।

शिवरात्रिका अवसरमा आयोजित प्रतियोगितामा ३० टिम सहभागी भएको संयोजक गुरुङले जानकारी दिए ।

बेंसीसहरका नगर प्रमुख गुमानसिंह अर्यालले उद्घाटन गरेका थिए । कार्यक्रम समापनका अवसरमा विजयी टिम तथा खेलाडीलाई बेंसीसहर २ का अध्यक्ष गणेश कँडेलले पुरस्कार वितरण गरेका थिए ।