पोखरा । केएन स्पोर्टस् प्रालिको आयोजनामा सुपर जेनरल इन्टर क्लब टी–२० क्रिकेट लिग सुरु भएको छ ।

सुपर जनरल कम्पनीको मुख्य प्रायोजनमा सोमबारदेखि सुरु प्रतियोगिताको उद्घाटन खेलमा चितवन क्रिकेट क्लब विजयी भयो । चितवनले स्याङ्जा क्रिकेट क्लबमाथि ६६ रनको फराकिलो जित निकालेको हो ।

पहिला व्याटिङ गरेको चितवनले १५४ रनको योगफल तयार पारेको थियो । राजेश ढकालले ८ चौका प्रहार गर्दै ४४ रनको महत्वपूर्ण पारी खेल्दा रोविन शर्माले ३१ रन जोड्दै साथ दिए । स्याङ्जाका बलर विष्णु पाण्डेले ४ तथा अशोक श्रेष्ठ, सुरज गुरुङ र दीपेश क्षतिले समान १–१ विकेट लिए ।

जितका लागि १ सय ५५ रनको लक्ष्य पछ्याएको स्याङ्जा १५.२ ओभरमा ८८ रनमै अलआउट भयो । उसको तर्फबाट विक्रम थापा र सौजन्य रेग्मीले समान २४ रनको योगफल तयार पारेका थिए ।

चितवनको बलिङतर्फ दीपेश श्रेष्ठ र कीर्तन गुरुङले ३÷३ विकेट लिए भने संघर्ष पौडेल र अनुज चन्द्रले पनि २÷२ विकेट लिए । चितवनका राजेश ढकाल म्यान अफ द म्याच घोषित भए ।

यसअघि नेपाल क्रिकेट संघका केन्द्रीय सदस्य ऋषि गौतमले बलिङ तथा प्रतियोगिताको मुख्य प्रायोजक सुपर जनरल कम्पनीका गण्डकी प्रदेश प्रमुख फैजल अलिले ब्याटिङ गर्दै खेल उद्घाटन गरेका थिए ।

कास्की जिल्ला क्रिकेट संघका अध्यक्ष सञ्जयकान्त सिग्देलले अफिसियल दिलीप अग्रहरिलाई म्याच बल प्रदान गरेका थिए ।

आयोजक केएन स्पोर्टस्का सञ्चालक समेत रहेका प्रतियोगिता संयोजक कमल थापाको अध्यक्षतामा भएको उद्घाटन समारोह प्रवीण ढकालले सञ्चालन गरेका थिए ।