पोखरा । कानुन व्यवसायीहरुको छाता संगठन नेपाल बार एसोसिएसनको १५ औं राष्ट्रिय सम्मेलन पोखरामा हुने भएको छ ।

आगामी २०७८ साल जेठ १४ देखि १६ सम्म पोखरामा हुने सो सम्मेलन हुने तय भएको हो । पोखरामा २०५० सालयता बारको राष्ट्रिय सम्मेलन भएको थिएन ।
प्रत्येक ३ वर्षमा हुने सम्मेलन हुँदैआएको छ । सम्मेलनको उद्घाटन राष्ट्रपति विद्यादेवी भण्डारीले गर्ने कार्यक्रम छ ।

नेपाल बारका ८९ वटा बार इकाइका प्रतिनिधि सहित करिब ४ हजार कानुन व्यवसायीको सहभागिता रहने बार केन्द्रीय उपाध्यक्ष सुरेन्द्र थापामगरले जानकारी दिए ।

उनका अनुसार सम्मेलनले राष्ट्रिय तथा अन्तर्राष्ट्रिय प्रस्ताव पारित गर्ने छ । यस्तै, सम्मेलनले निष्पक्ष, स्वतन्त्र र निर्भिक न्यायपालिकाको बारेमा प्रस्ताव गर्नुका सार्थ विभिन्न कार्यपत्र पारित गर्नेछ ।

कानुन व्यवसायलाई आत्मनिर्भर, व्यावसायिक, दक्ष र मर्यादित एवं विश्वसनीय कसरी बनाउने, स्वतन्त्र न्यायपालिकाभित्र र बाहिर संवैधानिक संस्थाले गर्ने आक्रमणबाट न्यायपालिकालाई कसरी जोगाउने लगायत विषयमा पनि छलफल हुने आयोजकले जनाएको छ ।

यसअघिको २०७४ सालमा १४ औं सम्मेलन नेपालगञ्जमा सम्पन्न भएको थियो ।

कोभिड–१९ बाट आक्रान्त पर्यटकीय नगरी पोखराको समग्र पर्यटन प्रवद्र्धनका लागि पनि सम्मेलन पोखरा तय गरिएको हो । यहाँ सम्मेलन हुनु पोखराको लागि पनि गौरवको विषय भएको उपाध्यक्ष थापामगर बताउँछन् ।

सम्मेलन सफल पार्न बार अध्यक्ष चण्डेश्वर श्रेष्ठको अध्यक्षतामा मूलआयोजक समिति गठन गरिएको छ । समितिमा बारका पूर्व अध्यक्ष, महासचिव, उच्च अदालत र जिल्ला अदालत बारका प्रतिनिधि सदस्य रहने छन् ।