वालिङ पहिरोमा ५ जनाको मृत्यु, ४ बेपत्ता

आदर्श समाज सम्वाददाता
असाेज ८, २०७७

पोखरा, ८ असोज । अविरल वर्षापछि स्याङ्जाको वालिङ नगरपालिकामा पहिरोमा परी ५ जनाको मृत्यु भएको छ । पहिरोमा ४ बेपत्ता छन् भने १ घाइतेको उपचारार्थ अस्पताल लगिएको छ ।

वालिङ–१४, तमादीकी माया नेपालीको घरमाथिबाट बिहान ६ बजे खसेको पहिरोमा परिवारका १० सदस्य पुरिएका हुन् ।

मृत्यु हुनेमा ४८ वर्षीया माया नेपालीसहित २७ वर्षीया उमाकला नेपाली, ३० वर्षीय दीपक नेपाली, ६० वर्षीया सानी नेपाली र ९ वर्षीय विवश नेपाली हुन् । पहिरोमा पुरिएकी १६ वर्षीया मनीषा नेपालीलाई भने जीवितै उद्धार गरी उपचारार्थ गण्डकी मेडिकल कलेज, पोखरा पठाइएको छ । बेपत्ता ४ जनाको खोजी कार्य भइरहेको जिल्ला प्रहरी कार्यालय स्याङ्जाका प्रवक्ता प्रहरी नायव उपरीक्षक राजेन्द्र प्रसाद अधिकारीले जानकारी दिए ।

यस्तै, स्याङ्जाकै कालीगण्डकी गाउँपालिका ४, गौतमडाँडाका बाबुराम दमाईको घर पुरिँदा उनका १६ वर्षीय छोरा विष्णुको मृत्यु भएको छ ।