चामे (मनाङ) । ‘समुदायमा आधारित संरक्षण’ अवधारणामा अन्नपूर्ण संरक्षण क्षेत्र आयोजना (एक्याप) को परिकल्पना अघि नै प्राकृतिक स्रोत र सुन्दरतामा भरिपूर्ण थिए–कास्की, लमजुङ, मनाङ, मुस्ताङ र म्याग्दी । यद्यपि ती स्रोतहरु व्यवस्थित थिएनन् । चोरीसिकारी बढी हुन्थे । तत्कालीन गण्डकी र धवलागिरि अञ्चलमा पर्ने यी पाँचै जिल्ला अहिले गण्डकी प्रदेशभित्र छन् । स्थानीयको सक्रियतामा संरक्षण सहितको उपभोग एक्यापको परिकल्पना हो । १० वर्षभित्रै समुदायलाई हस्तान्तरण गर्नुपर्ने म्याद सहित सन् १९८६ मा स्थापना भएको एक्याप अहिलेसम्म पनि कायम छ । त्यही शर्तमा वर्षेनी म्याद थप हुँदै आएको छ । तत्कालीन ५ जिल्लाका ५७ गाविसमा विस्तार भएको एक्याप नयाँ संरचना अनुसार १६ वटा स्थानीय तहमा पर्छ । अहिले देशमा अधिकारसम्पन्न तीन तहको सरकार छ । यी १६ स्थानीय सरकारले संविधानबाट प्राप्त अधिकार समेत प्रयोग गर्न पाएका छैनन् । संविधान अनुसार आफ्नो क्षेत्रभित्रको प्राकृतिक स्रोत परिचालन गर्ने अधिकार स्थानीय सरकारलाई छ । सबै स्रोतसाधन एक्यापले उत्खनन् र परिचालन गरिदिएपछि १६ वटै स्थानीय तह स्रोतविहीन छन् । तत्कालीन गाउँ विकास समितिसँग पटक–पटक द्वन्द्व पार गर्दै आएको यो संस्था अहिले स्थानीय तहसँग पनि समान द्वन्द्वमा छ । एक्यापको कानून अनुसार उसको क्षेत्राधिकारका सबै स्रोत उसैको हकभोगमा हुने उल्लेख छ । दुवैको कानून समानान्तर हुँदा एक्याप लागू भएका क्षेत्रमा समानान्तर सरकारजस्तो देखिन थालेको छ । यही द्वन्द्वको चपेटामा छन्, सर्वसाधारण नागरिकहरु ।
स्रोत उपभोगको अवरोधले स्थानीयसँग एक्यापको दूरी बढ्दै गएको छ ।
‘एक्याप गठन भएदेखि अहिलेसम्म स्थानीयले देख्ने गरी के काम भएको छ ? सधैं विकासमा अवरोध गर्ने ? स्थानीयको जनजीविकामा समस्या खडा गर्ने मात्रै हो,’ नेकपा मनाङका सचिव वेदबहादुर गुरुङ भन्छन्, ‘एक्याप छुट्टै छ । स्थानीय सरकार छुट्टै छ । जनताले कसको कानून मान्ने ?’ सन् १९८६ मा घान्दु्रकबाट सुरु अन्नपूर्ण संरक्षण क्षेत्र आयोजना मनाङमा १९९२ मा विस्तार भएको थियो । ‘कानूनी व्यवस्था नमान्ने भनेको होइन । प्राकृतिक, भौगोलिक र सांस्कृतिक विशिष्टतालाई पनि हेर्नुपर्छ,’ काँग्रेस मनाङका सचिव सुरेन्द्र गुरुङ भन्छन्, ‘एक्यापको मनोमानीले सर्वसाधारण जनता आफ्नै बारीको काठ काट्न पाउँदैनन् । देशमा गणतन्त्र आयो तर मनाङी जनतालाई गणतन्त्र आउनै सकेन ।’ जनस्तरको अपेक्षा अनुसार काम नगरेका कारण एक्यापसँग असन्तुष्टि बढेको उनको भनाइ छ । ‘कुनै कर्मचारी जाँदा प्रत्येक गाउँमा फूलमालाले स्वागत गर्थे । अहिले लखेट्ने समय आयो,’ उनले थपे, ‘विगतमा एक्यापको ठूलो योगदान पनि छ । आजभोलि त्यो चार्मिङ छैन । खारेज गर्दा राम्रो ।’
त्यसो त, कानूनी रटान र स्रोत उपभोगमा गरिएको बन्देजले स्थानीयसँग एक्यापको दूरी पनि बढ्दै गएको छ । आयोजनामा जनसहभागिता बढाउन गाउँ–गाउँमा संरक्षण क्षेत्र व्यवस्थापन समिति गठन भएका छन् । कसैले काठदाउरा काट्नुपर्दा तिनै समितिबाट सिफरिस लिनुपर्छ । सिफारिस दिँदा उठेको रकम समितिले विकास निर्माण र क्षमता अभिवृद्धि गर्न खर्च गर्छन् । तर कुन समितिले कति पैसा उठायो र कहाँ खर्च भयो भन्ने हिसाब–किताब पारदर्शी छैन । समितिको म्याद सकिएको २ वर्ष बितिसक्यो । एक्यापकै म्याद थप्ने विषयमा अन्योल हुँदा नयाँ समिति गठन हुन नसकेको हो । ‘योजना छनोटमा स्थानीयको सक्रियता छैन । कार्यालयले जे योजना पठायो त्यही काम गर्नुपर्छ । यसरी त विकासमा जनताको सहभागिता नै देखिएन,’ जिल्ला समन्वय समिति मनाङका प्रमुख यज्ञप्रसाद घले भन्छन्, ‘एक्यापले उठाएको पैसा कति छ ? कहाँ खर्च भयो, त्यो पारदर्शी छैन ।’ अन्नपूर्ण संरक्षण क्षेत्र आयोजनाको म्याद नथप्न अधिकांशको सुझाव छ ।
म्याद नथप्न चौतर्फी दबाबकै बीच गएको माघमा १ वर्षका लागि सरकारले म्याद थपिदियो । अब एक्याप कसको मातहत चलाउने भन्ने टुंगो अझै लागेको छैन । तीनवटै सरकारले आफूलाई दिनुपर्ने माग राखेका छन् । ‘पर्यटन रोयल्टीमा सबै सरकारको नजर पुगेको छ । स्रोत देखेर सबैले एक्याप मागेका हुन्,’ सिएमसी टंकी मनाङका अध्यक्ष विनोद गुरुङले भने, ‘यो विवाद सरकारले छिट्टै टुङ्ग्याइदियोस् ।’ उनका अनुसार ग्रामीण क्षेत्रमा एक्यापकै कारण नेतृत्व र सीप विकासमा टेवा पुगेको छ । ‘कति सिएमसीका अध्यक्षहरु अहिले सांसद हुनुहुन्छ । हामी नै जान्ने बुझ्ने भएको पनि एक्यापमा लागेपछि हो,’ उनले भने, ‘आजभोलि विकास निर्माणको काममा अवरोध गरेपछि असन्तुष्टि बढ्न थालेको छ । स्थानीयसँग समन्वय गर्न सके अहिलेको वितृष्णा घटेर जान्छ ।’ एक्याप क्षेत्रमा प्रवेश गर्दा विदेशी पर्यटकले २ हजार तिर्नुपर्छ भने सार्क मुलुकका पर्यटकलाई २ सय शुल्क तोकिएको छ । एक्यापको मुख्य आम्दानीको स्रोत यही हो । संरक्षण क्षेत्र व्यवस्थापन नियमावली २०५३ को अधिनमा एक्याप सञ्चालित छ ।
एक्याप मनाङका प्रमुख बाबुलाल तिरुवाले विकासका काममा केही कमजोरी भएको स्वीकार्दै सुधारेर अघि बढ्ने प्रतिबद्धता जनाए । ‘पूरै कर्मचारीको विश्वासका काम गर्ने हो । वहाँहरुले कहिलेकाहीँ गलत रिपोर्ट दिँदा विरोध आएका छन्,’ उनले भने, ‘आगामी दिनमा सुधारेर जानु सबैको हितमा छ । एक्याप स्थानीयकै पक्षमा छ । संरक्षणको पक्षमा छ ।’ विकास निर्माणका काममा कुनै अवरोध नगरेको उनले दाबी गरे । ‘कसैले घर बनाउँदा काठ काट्न पाउँदैनौ भनेको छैन । तर नियमानुसार गर्नु भनेको हो,’ उनले अघि थपे, ‘मनपरी गर्न दिने हो भने वनजंगल बाँकी रहँदैन । हरियाली डाँडा उजाडिन्छ ।’ आगामी दिनमा स्थानीय सरकारसँगको समन्वयमा कार्यक्रम तय गर्ने उनले सुनाए ।
मनाङको सबैभन्दा ठूलो स्रोत भनेकै पर्यटन र जडिबुटी हो । यो दुवै क्षेत्र एक्यापको स्वामित्वमा छ । संविधानले गाउँपालिकालाई अधिकारसम्पन्न बनाएको छ । यद्यपि मनाङका ४ वटै गाउँपालिकाको प्राकृतिक स्रोतमाथि कुनै पहुँच छैन । सबै गाउँपालिकामा २०४९ सालमा एक्याप लागू भएदेखि यहाँका स्रोतसाधन संकलन र प्रयोगको अधिकार पूरै उसैसँग छ । ‘प्रदेश सरकारले स्थानीय स्रोतको कर जम्मा गरिदिन भन्छ । हामीले कुनै स्रोत चलाउनै पाएको छैन,’ चामे गाउँपालिका अध्यक्ष लोकेन्द्र घले भन्छन्, ‘संविधानले आफ्नै स्रोतबाट गाउँपालिका चलाउनु भनेको छ । सबै स्रोत एक्यापले हडपेको छ । मनाङका स्थानीय तहले कुन स्रोत खोज्ने ?’ आफैले संरक्षण गरेको स्रोत आफैले प्रयोग गर्न नपाउँदा एक्यापप्रति वितृष्णा बढेको उनको भनाइ छ । ‘भोलिको सन्ततिको लागि भनेर प्रकृतिको संरक्षण गरेको हो नि । प्रयोग नै गर्न नपाए संरक्षण किन गर्ने ?,’ उनले प्रश्न गरे, ‘घर बनाउँदा काठ काट्न नपाउने ? एक ट्याक्टर बालुवा निकाल्न नपाउने ? घरअगाडि बाटो बनाउन नपाउने ?’
नासो गाउँपालिका अध्यक्ष चन्द्र घलेले एक्याप र स्थानीय सरकारका कार्यक्रममा एकरुपता नभएको बताए । ‘वहाँहरु छुट्टै सरकारजस्तो गर्नुहुन्छ । गाउँसभामा कार्यक्रम पेस गर्नुहुन्न,’ उनले भने, ‘उनीहरुले सञ्चालन गरेका कार्यक्रममा पनि गाउँपालिकाको पैसा पर्छ । आपसी समन्वय नहुँदा योजनामा दोहोरोपना छ ।’ उनको बुझाइमा एक्याप र स्थानीय सरकारबीच प्राकृतिक स्रोतसाधनको परिचालनमा द्वन्द्व बढी छ । ‘एउटा काठ काट्नुप¥यो, एक्यापको स्वीकृति चाहिन्छ । एउटा ढुंगा निकाल्न पनि एक्यापलाई गुहार्नु पर्छ,’ उनी भन्छन्, ‘गाउँपालिकाले पनि एक्यापलाई सोधेर काम गर्नुपरे जनप्रतिनिधिको औचित्य के ? संघीयताको औचित्य के ?’
मनाङका प्रमुख जिल्ला अधिकारी ध्रुव गिरिले स्थानीय सरकारसँग समन्वय नभएका कारण विवाद देखिएको बताए । ‘सबै खत्तमै गरेको होइन । जुन हिसाबले तल्लो तहसँग समन्वय हुनुपथ्र्यो, त्यो देखिएन,’ उनले भने, ‘क्षेत्राधिकार समान हुँदा द्वन्द्व बढेको हो । धेरै समस्याको समाधान दुई पक्षबीचको समन्वयले हुन सक्छ ।’ स्रोतकै उपभोगमा बढी समस्या देखिएको उनको भनाइ छ । संघ सरकारले नै यसको निकास निकाल्नुपर्ने उनले सुझाए । स्रोत चलाउन पाउनुपर्ने माग सहित स्थानीयहरुले एक्यापअन्तर्गत विभिन्न जिल्लाका कार्यालयहरुमा पटक–पटक तालाबन्दी पनि गरेका थिए । मनाङका तिल्चे, थोंचे, नाचै र ताल क्षेत्रमा सामुदायिक वन छन् भने अरु सबै क्षेत्र एक्याप मातहत छन् ।
एक्यापका कार्यक्रम निर्देशक राजकुमार गुरुङ स्रोत परिचालनको समस्या संरक्षण क्षेत्रभरी रहेको भन्दै सरकारले नै निकास निकाल्नुपर्ने बताउँछन् । ‘यो सिंगो क्षेत्रको समस्या हो । स्थानीय तहले आफ्नो ऐन लागू गर्न खोज्छ । हामीले हाम्रो नियम हेर्छौं । यसैले समस्या भएको छ,’ उनले भने, ‘कानूनबाटै क्लीयर भएको छैन । हामी त राज्यको निर्देशन कार्यान्वयन गर्नेमात्रै हो ।’ उनले जिल्लाभित्रको विकास निर्माणमा एक्यापले कुनै अवरोध नगर्ने बताए । ‘स्थानीय विकासको काममा ढुंगा, गिटी, बालुवा संघीय कानून अनुसार निकाल्न पाउँछन् । बाहिर निकासी गर्न चाहिँ पाइँदैन,’ गुरुङले भने, ‘स्रोत परिचालनमा केही असमझदारी भए छलफल गरेर निकास दिनुपर्छ ।’ स्रोत उपभोगमै समस्या भएपछि आइतबार जिल्ला समन्वय समितिले एक्याप र सरोकारवालासँग छलफल आयोजना गरेको थियो । बैठकले समन्वयबाट अघि बढ्ने निर्णय गरेको छ ।
बस्ने घर छैन, पाहुना कहाँ राख्ने ?
चामे गाउँपालिका २, थान्चोककी सुन्तासी घले उमेरले ६० कटिन् । घरमा आफूभन्दा पाको उमेरका श्रीमान बाहेक कोही छैनन् । भत्किएको घर भर्खरै मर्मत गरेकी छिन् । ट्वाइलेट र बाथरुम व्यवस्थित छैन । उनलाई एक्यापले होमस्टे चलाउन सामग्री दिएको छ । उनले पाएको दुईवटा ओछ्यान, सिरक, सिरानी र तन्ना कोठामै थन्किएको छ । ‘आमा बूढी हुनुहुन्छ । बिरामी भएर अस्पताल गैरहनुपर्छ,’ सुन्तासीकी छोरी विमला घलेले भनिन्, ‘होमस्टे भनेको के हो थाहै छैन । धमाधम सामान भिराएर पठाएका छन् । पाहुना कसरी राख्ने ?’
सोही ठाउँकी मोति गुरुङको सानो घर छ । मुस्किलले आफ्नो परिवार सुत्न समेत कोठा पुग्दैन । उनको घरमा पनि होमस्टे चलाउन सामग्री दिइएको छ । उनीहरुजस्तै त्यो गाउँमा १४ परिवारले होमस्टेको सामान पाएका छन् । सामान पाएका अधिकांशले होमस्टे चलाउन सक्ने अवस्था छैन । स्थानीयसँगको सहमतिबिना सामान दिएका कारण होमस्टे चलाउन समस्या छ ।
होमस्टेको सामान बाँडेदेखि होटलसँगको सम्बन्ध चिसिएको छ । ‘होटलमा आइरहेका पाहुना होमस्टेमा जान्छन् । यति धेरै लगानी गरेको होटललाई त असर गर्छ,’ होटल व्यवसायी धनबहादुर गौचनले भने, ‘होटल भएको ठाउँमा होमस्टे खोल्दा राम्रो हुँदैन । सुधार्नुपर्छ ।’ एक्यापले यो वर्ष थान्चोक सहित खाङसारमा पनि होमस्टे सञ्चालन गर्ने निर्णय गरेको छ । खाङसारमा स्थानीयकै अवरोधले खरिद गरिएको सामान वितरण हुन सकेको छैन । यो दुवै होमस्टे दर्ता गरिएका छैनन् ।
Related News
सम्बन्धित समाचार
त्रासैत्रासमा तंग्रिदै कागबेनी
मनिपालमा अत्याधुनिक एमआरआई मेसिन
१३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
कतारी अमिर स्वेदश फिर्ता : पोखरा–कतार उडान माग
कास्कीमा एसइई उत्तरपुस्तिका परीक्षण रोकियो
hero news full width
मुख्य समाचार
गण्डकीमा डायलाइसिसका लागि अब पालो कुर्न नपर्ने
स्वदेश फर्किए कतारी अमिर
वैशाख १२, २०८१कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
वैशाख १२, २०८१रोजगार खोज्दै मेलामा
वैशाख १२, २०८१कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१फेवातालमा दुर्घटनामा परेका ५ जनाको उद्धार
वैशाख ११, २०८१