हेमजा, १८ भदौं। अन्नपूर्ण गाउँपालिका १ र २ स्थित ठुलाचौरमा गाँजा फडानी गरिएको छ। प्रहरी चौकी भदौरे नागडाँडाको सक्रियतामा बुधवार गाँजा फाडिएको हो।

उक्त गाउँमा रहेका करिव ५ सय बढी गाँजाका बोट काटी आगो लगाएर नष्ट गरिएको प्रहरी चौकी भदौरे नागडाँडाका प्रमुख, प्रहरी सहायक निरीक्षक जयलाल बुढाले जानकारी दिए।

उक्त कार्यमा प्रहरी सहायक निरीक्षक बुढाको नेतृत्वमा ८ जनाको प्रहरी टोली खटिएको थियो। जसमा स्थानीय युवा क्लब, टोल विकास संस्था र आमा समूहले पनि सघाएका थिए।गाँजा प्रहरी एक्लैले फाडे पनि नष्ट गर्ने क्रममा भने स्थानियले पनि सहयोग गरेका थिए।

विशेष गरी पोखरा क्षेत्रमा लागुऔषधको समस्या हुने गरेकोमा उक्त गाँजा नष्ट कार्यले केही अशंमा भएपनि सोको नियन्त्रणमा थप सहजता आउने जिल्ला प्रहरी कार्यालय कास्कीका प्रवक्ता एवं सुचना अधिकारी प्रहरी नायव उपरिक्षक सुवास हमालले विश्वास व्यक्त गरे।

त्यस्तै प्रहरीले पोखरा २१, पोखरा २३, मादी गाउँपालिकाका केही स्थानमा पनि यसपटक हरियो गाँजा नष्ट गरेको छ। अभियानलाई निरन्तरता दिने कास्की प्रहरीले जनाएको छ।