नवलपरासी । नारायणी नदीमा यस बर्षकै ठूलो बाढी आएको छ । नवलपरासीको त्रिवेणी गण्डक व्यारेजमा गरिएको जल मापनमा अहिले गण्डक व्यारेजमा नारायणी नदीको पानीको बहाव ४ लाख ३० हजार क्युसके पुगेको छ ।

जिल्ला प्रशासन कार्यालय नवलपुरका प्रमुख जिल्ला अधिकारी पिताम्बर घिमिरेका अनुसार अहिले गण्डक ब्यारेजका ३६ वटा ढोका सबै खोलिएको छ ।

गण्डकमा पानीका बहाब ३ लाख क्युसेक नाघेपछि खतरा मानिन्छ । अहिले नदीको किनार आसपासका बस्ती तथा जमिन डुबान र कटानको खतरामा परेको स्थानीयले बताएका छन् ।

उक्त नदीसँग जोडिएको विनयी त्रिवेणी गाउँपालिका ६ र ७ को ठटिया खोलामा निर्माणधिन अवस्थामा रहेको बाँध फुट्न अवस्थामा पुगेको स्थानीयले प्रेम चन्द्र गुप्ताले बताए ।

त्यहाँ स्थानीय र सुरक्षाकर्मीले सिमेन्टको बोरामा माटो र बालुवा हालेर बाँध फुट्नबाट जोगाउने प्रयास गरिरहेका छन् ।

त्यसैगरी सुस्ता गाउँपालिका ४ नर्सही बि ग्याप ठोकर नम्बर ६, ९, १०, ११ र सुस्ता ५ को नेपाल बाँधको ठोकर नम्बर ३ र ४ मा पानीको बहाब अत्यधिक बढेको छ । जस्ले गर्दा ठोकरहरु फुट्ने खतरा बढेको छ ।

बाँध भत्किने खतरा रहेकोले यस भेगका रामनगर, पक्लिहवा, सक्कर दिनही लगायत दर्जनौं डुबानको खतरा भुआर्जन सम्पर्क कार्यालय बाल्मीकिनगरका अधिकृत (लाइजन) तारासिंह थापाले बताए ।

त्यसैगरी पश्चिम नवलपरासीको सरावल गाउँपालिका ५, ६ र ७ को रामपुर खडौना, मधवलिया, कुसौली, प्युटाहा, भुजहवा, गडौरी, कुर्थावल, प्रतापपुर ३ सोमनी, बर्गदवा, नन्दपुर, प्रतापपुर २ सेमरी, घोडाहा लगायतका ठाउँमा लगायतका हजारौं विगाहा धानबाली पानीको निकास नहुँदा डुबानमा परेको सवराल गाउँपालिका अध्यक्ष राधेश्याम चौधरीले बताए ।

त्यसैगरी सुस्ता गाउँपालिका ५ सुस्ता २ सय ६५ घर डुबानमा परेको स्थानीय बासिन्दा रविन्द्र जैसवालले बताए ।

यसैबीच पश्चिम नवलपरासीका सहायक प्रमुख जिल्ला अधिकारी जोरासिंह माझी, प्रहरी नायव उपरीक्षक राजु लामा, भुआर्जन सम्पर्क कार्यालय बाल्मीकिनगरका अधिकृत (लाइजन) तारासिंह थापा लगायतले घटना स्थलको निरीक्षण गरेका छन् ।

राजु लामा, तारासिंह थापा, स्थलगत निरीक्षण गरेका छन् ।