पोखरा । नेपाल रेडक्रस सोसाइटी पोखरा १० उपशाखाको आयोजनामा विपद् व्यवस्थापनसम्बन्धी अभिमुखीकरण गरिएको छ । अभिमुखीकरणमा वडाका टोल विकास संस्था, आमा समूह र अन्य संघसंस्थाबाट ७५ जनाको सहभागिता थियो ।

पोखरा १० का अध्यक्ष राजेश गुरुङले कार्यक्रम उद्घाटन गर्दै पवित्र र मानवीय सेवामा सधैं खटिने रेडक्रसको वडा उपशाखाले वडाभित्र रहेका टोल टोल र घर घरमा पर्न सक्ने विपद् न्यूनीकरण तालिम आयोजना गरेकाले सहयोग गर्न तयार रहेको बताए ।

कार्यक्रममा नेपाल रेडक्रस सोसाइटी कास्की शाखाका विपद् व्यवस्थापन उपसमितिका प्रशिक्षक इन्जिनियर सागर गौतम, दीपकनाथ पौडेल र सुनीता भण्डारीले सहभागीलाई प्रशिक्षण दिएका थिए । पोखरा १० का वडा सदस्य परमेश्वर कार्की, वडा सदस्य पूर्णचन्द्र न्यौपाने, उपशाखाका सदस्य निर्मला श्रेष्ठ लगायतले बोलेका थिए ।

उपशाखा सभापति जीवन श्रेष्ठको अध्यक्षतामा भएको कार्यक्रममा उपशाखा १० का उपसभापति पवित्रादेवी गुरुङले स्वागत र सचिव विनप्रसाद गुरुङले सञ्चालन गरेका थिए ।