कोरोना भाइरसबाट संक्रमितमध्ये १० जना निको भइ बुटवलको कोरोना विशेष अस्पतालबाट डिस्चार्ज भएका छन् । उनीहरू सबैजना कपिलवस्तुका हुुन् ।

दुई साताअघि अस्पताल भर्ना भएका ती संक्रमितको लगातार २ पटकको पीसीआर रिर्पोट नेगेटिभ आएपछि डिस्चार्ज गरिएको बुुटवल धागो कारखानास्थित कोरोना विशेष अस्पतालका फोकलपसर्न वरिष्ठ कन्सलटेन्ट डा. सुुदर्शन थापाले बताए ।

उनले भने, ‘बिरामीलाई निको बनाएर पठाउँदा हामीलाई खुसी लागेको छ ।’ निको भएर जानेहरुले ‘कोरोनाबाट डराउनुपर्दैन, सजिलै जित्न सकिन्छ’ भन्ने सन्देश पनि दिएको उनी बताउँछन्।

सो कोरोना अस्पतालमा रुपन्देही र कपिलवस्तुका ३६ जनाले उपचार गराइरहेका थिए । यसअघि रुपन्देहीको कोटहीमाई गाउँपालिकाका २५ वर्षीय युवा निको भएर घर गइसकेका छन्।

प्रदेश ५ मा कोरोना संक्रमितको संख्या सबैभन्दा धेरै अर्थात् २ सय ७१ छ । जसमध्ये २ जनाले ज्यान गुमाए भने ३२ जना निको भएका छन् ।

लुम्बिनी प्रादेशिक अस्पतालका मेडिकल सूपरिन्टेन्डेण्ड डा. राजेन्द्र खनालले मानिस अनुशासनमा बस्ने सकेमा कोरोना संक्रमण रोक्न सकिने बताए।

लकडाउन पालना गरेर घरमै बस्नुपर्ने र सरसफाइमा ध्यान दिनुपर्ने उनको सुझाव छ ।

शुक्रबारमात्रै बाँके खजुरास्थित सुुशील कोइराला प्रखर क्यान्सर अस्पतालबाट २१ जनाको कोरोनो जितेको घर फर्किएका थिए ।