पोखरा । पोखरामा भएको १४ औं संस्करणको सफल पोखरा अन्तर्राष्ट्रिय म्याराथनको समीक्षा गरिएको छ ।

पोखरा, भुतपुर्व खेलाडी मञ्च नेपालको आयोजनामा भएको समीक्षा कार्यक्रममा मञ्चका अध्यक्ष तेज गुरुङले भएका गल्ती, कमी कमजोरीहरुलाई सच्याउँदै आगामी वर्ष हुने म्याराथनलाई अझै परिष्कृत, सभ्य र भव्य गर्न मञ्च सधैं सचेत र सजग बन्नुपर्ने धारणा राखे ।

उनले पोखरा म्याराथनलाई सफल बनाउन सहयोग गर्ने मुख्य प्रायोजक, प्रायोजक संस्थाहरु, गण्डकी प्रदेश सरकार, पोखरा महानगर, राष्ट्रिय खेलकुद परिषद, नेपाल ओलम्पिक कमिटी, पोखरास्थित सामाजिक सबै संघसंस्था, आमा समूहहरु, संचार संस्था तथा पत्रकारहरु, विद्यालयहरु, खेलाडी लगायतलाई धन्यवादसहित आभार समेत प्रकट गरे ।

समीक्षामा पोखरा म्याराथनमा गठित विभिन्न समितिका संयोजकहरुले आ–आफ्ना धारणाहरु राखे । पोखरा म्याराथन सफल बनाउन २० वटा विभिन्न समितिहरु गठन गरिएको थियो ।

सो अवसरमा बोल्दै पोखरा म्याराथनका अन्तर्राष्ट्रिय पार्टनर संस्था पोखरेली मञ्च युकेका अध्यक्ष मानप्रसाद गुरुङले मञ्चको तर्फबाट पोखरा म्याराथनलाई सहयोग जारी रहने प्रतिबद्धता जनाए । उनले युकेमा समेत हामीले म्याराथनको समीक्षा वैठक गर्ने उल्लेख गरे । आगामी दिनमा म्याराथनको सहयोगको निरन्तरताबारे छलफल गर्ने उनको भनाई थियो ।

कार्यक्रममा पोखरेली मञ्च युकेका सल्लाहकार महेश गुरुङ, नरजङ गुरुङ, समाजसेवी तथा सहारा युकेका सदस्य योगेश गुरुङले यस संस्करणको म्याराथनले नयाँ उत्साहसँगै नयाँ सन्देश दिएको उल्लेख गरे । पोखराको खेलकुदमा नयाँ आयाम थपेको उनीहरुको भनाई थियो ।