पोखरा । सांकेतिक भाषा सिकोंं, बहिराहरुसँगको सञ्चारमा सहयोगी बनौं नाराका साथ बहिरा भाषा तालिम सुरु भएको छ । पोखरा महानगरपालिका सामाजिक विकास महाशाखा अपांग शाखा पाँचौं तह कर्मचारी राधादेवी विकले तालिम शुभारम्भ गरिन् । उनले सांकेतिक भाषा ३ महिना अवधिको तालिमले सञ्चारमा सुन्ने र बहिराबीचको मनका कुरा सहज व्यक्त गर्न सकिने भएकाले यस प्रकारमा तालिम अपरिहार्य भएको बताइन् ।

गण्डकी बहिरा संघका अध्यक्ष आइलाल शाहीको अध्यक्षतामा भएको कार्यक्रममा संघका वरिष्ठ सल्लाहकार हरिप्रसाद बरालले संघले आफ्नो स्थापनादेखि सांकेतिक भाषा तालिमलाई जोड दिएको बताए ।

सिर्जना विकास केन्द्रका सचिव भीमप्रसाद सुवेदीले सांकेतिक भाषा खास गरी बहिराका अभिभावक लक्षित हुनुपर्नेमा जोड दिए ।

राष्ट्रिय अपांग महासंघ पोखराका केन्द्रीय सदस्य विष्णु सिग्देलले आफू पटक पटक तालिममा सहभागी भई भाषा सिकेको अनुभव सुनाए ।

संघका महासचिव किसान तामाङले सञ्चालन र दीपकप्रसाद पराजुलीले स्वागत गरेका थिए । तालिममा दोभाषे अन्जली सुनारले सहजीकरण गरेको संघका संस्थापक महासचिव सूर्यमोहन बरालले जानकारी दिए ।