पोखरा । पोखरा वृद्धाश्रमले २८ औं स्थापना दिवस मनाएको छ । वृद्धाश्रमले बिहीबार ज्येष्ठ नागरिक मिलन कार्यक्रम गरी स्थापना दिवस मनाएको हो । कार्यक्रममा जिल्ला समन्वय समिति कास्कीका प्रमुख लीलाधर पौडेलले ज्येष्ठ नागरिक ज्युँदा इतिहास र भविष्यका मार्गदर्शक भएको उल्लेख गर्दै उनीहरुको सम्बद्र्धन र राज्यले प्रदान गरेका सेवा, सुविधा र सम्मान निर्वाधरूपले उपयोग गर्ने वातावरण निर्माणका लागि सबै पक्ष कटिबद्धताका साथ लागि पर्नु पर्ने उल्लेख गरे ।

ज्येष्ठ नागरिकका सबालमा बनेका ऐन, कानुन र व्यवस्था कडाइका साथ लागु गर्ने अभियान स्वरूप नेपालमा नै पहिलो पटक जिल्ला समन्वय समिति कास्कीले समन्वयात्मक बैठक मार्फत पहल सुरुआत गरेको जानकारी दिँदै निरन्तर यी कार्य जारी राख्ने उनले प्रतिबद्धता जनाए ।

पोखरा महानगर पालिका वडा नम्बर १७ का वडाध्यक्ष राधिका शाहीले ज्येष्ठ नागरिकका क्षेत्रमा पोखरा वृद्धाश्रमले खेलेको भूमिका महत्वपूर्ण रहेको भन्दै उदाहरणीय सामाजिक कार्यमा वडाको सधैं साथ रहने बताइन् ।

पोखरा महानगरपालिका वडा नम्बर १५ का वडा सदस्य बलराम पौडेल, ज्येष्ठ नागरिक मञ्च गण्डकीका अध्यक्ष रोमा शाक्य, निवृत्त शिक्षक संघ केन्द्रीय उपाध्यक्ष तोयनाथ लामिछाने, लेखक रवीन्द्र माकाजु, व्राह्मण समाजका केन्द्रीय उपाध्यक्ष भेषराज लम्साल लगायतले उक्त अवसरमा शुभकामना व्यक्त गरे । वृद्धाश्रमको विकास र सम्बद्र्धनमा योगदान गर्ने कर्मचारी तथा आजीवन सदस्यहरूलाई उक्त अवसरमा सम्मान गरिएको थियो ।

बृद्धाश्रमका अध्यक्ष कुशुमकेशव पराजुलीको सभापतित्वमा भएको कार्यक्रममा स्वागत सहसचिव सीता काफ्ले र सञ्चालन सचिव धर्म गुरुङले गरेका थिए ।