पोखरा । गण्डकी प्रदेशको सत्ता समीकरणबाट माओवादीले हात झिकेको छ । मुख्यमन्त्री सुरेन्द्रराज पाण्डेले माओवादीका २ मन्त्री बर्खास्त गरेको भोलिपल्ट बुधबार माओवादीले मुख्यमन्त्रीलाई दिएको समर्थन फिर्ता लिएको हो । बुधबार संसद् सचिव हरिराज पोखरेललाई दलका नेता हरिबहादुर चुमानले समर्थन फिर्ता लिएको पत्र बुझाएका छन् । ‘मुख्यमन्त्री सुरेन्द्रराज पाण्डेलाई दिइएको समर्थन आजकै मितिदेखि लागु हुने गरी फिर्ता लिइएको छ,’ पत्रमा भनिएको छ । केन्द्रमा बनेको नयाँ समीकरणका कारण गण्डकीको सत्ताबाट बाहिरिने निर्णय गरेको माओवादी दलका नेता चुमानले बताए । ‘प्रदेशको भन्दा पनि केन्द्रकै समीकरणका कारण यहाँसम्म बाछिटा आइपुग्यो । हामीले समर्थन फिर्ता लिएका छौं,’ उनले भने ।
मुख्यमन्त्री पाण्डेले मन्त्रीहरुलाई बर्खास्त गरेर हतारो देखाएको उनको टिप्पणी छ । ‘उहाँले मन्त्री बर्खास्त नगर्नुभएको भए हामीलाई समर्थन फिर्ता लिन गाह्रो पथ्र्यो । मन्त्री हटाउनुभो, हामीलाई नि सजिलो भयो,’ उनले अघि भने, ‘हाम्रो रहरभन्दा बाध्यता नै हो । अब कांग्रेसबाहेक सरकार गठनको प्रक्रिया थाल्छौं ।’
माओवादीले समर्थन फिर्ता लिएसँगै ३० दिनभित्र मुख्यमन्त्री पाण्डेले विश्वासको मत लिनुपर्छ । संविधानको धारा १६८ उपधारा (२) अनुसार पाण्डेको नेतृत्वमा बैशाख १५ गते सरकार गठन भएको हो । उनले विश्वासको मत नपाए सरकार ढल्छ । सम्भव भएसम्म उपधारा (२) अनुसार नै नयाँ सरकार गठन हुने नयाँ गठबन्धनको दाबी छ भने सत्तारुढ कांग्रेस उपधारा (३) मा जाने बताउँछ । ‘सर्वोच्चले नै सम्भव भएसम्म (२) को सरकार बनाउन बाटो खोलिदिएको छ । सम्भव भएन भने मात्रै (३) मा जाने हो,’ चुमानले भने ।
धारा १६८ मा सरकार गठनबारे व्यवस्था छ । उपधारा (१) मा बहुमत प्राप्त दलले सरकार गठन गर्ने व्यवस्था छ भने (२) मा दुई वा सोभन्दा बढी दलहरुको संयुक्त सरकारको परिकल्पना गरिएको छ । उपधारा (३) मा सबैभन्दा ठूलो दलको सरकार बन्ने र उपधारा (५) मा समर्थन जुटाउन सक्ने जुनसुकै सांसदले मुख्यमन्त्रीमा दाबी गर्न सक्ने व्यवस्था छ । सभामुख कृष्ण धितालले दलहरुको सल्लाह अनुसार चल्ने बताए । ‘जानकारहरुसँग कानुनी सल्लाह लिएर अगाडि बढ्छु,’ उनले भने, ‘दलहरुसँग पनि कुरा गर्छु । अहिले नै कसरी चल्ने भन्ने टुंगो छैन । समय छ, संवाद गरौंला ।’
टर्ला मध्यावधिको खड्को ?
केन्द्रमा बनेको समीकरणले गण्डकीमा सरकार बन्न सम्भव देखिँदैन । यहाँका ५ दलमध्ये केन्द्रीय समीकरणमा एमाले, माओवादी र एकीकृत समाजवादी मात्रै समेटिएका छन् । तीन दलको गण्डकीमा ३१ सांसद मात्रै छन् । तर सभामुख माओवादीकै भएकाले सरकार गठन प्रक्रियामा उनी सामेल हुन पाउँदैनन् । नयाँ गठबन्धनले गण्डकीमा राप्रपालाई फकाउने प्रयास गरेको छ । तर आफूहरु आन्दोलनमा रहेकोले सरकार निर्माणमा सहभागी नहुने राप्रपा संसदीय दलका नेता पञ्चराम गुरुङले बताए । त्यसो हुँदा नयाँ समीकरणमा ३० र विपक्षमा २९ मत हुन्छ ।
६० सदस्यीय प्रदेशसभामा पहिलो दल कांग्रेससँग २७ सिट छ । राप्रपाको २ सिट छ । नयाँ समीकरणको एमालेसँग २२, माओवादीसँग ८ (सभामुखसहित) र एकीकृत समाजवादीको १ सिट छ । माओवादीको चुनाव चिन्हबाट निर्वाचित भएका नेपाल समाजवादी पार्टीका सांसद फडिन्द्र देवकोटा पनि नयाँ समीकरणबाट बाहिर बसेका छन् । उनी दलको बैठकमा पनि सहभागी भएनन् । निर्वाचन कानुनले दिएको सुविधा प्रयोग गर्दै नेपाल समाजवादी पार्टी संघ र प्रदेशको चुनावमा माओवादी केन्द्रको हँसिया हथौडाबाटै चुनाव लडेको थियो । माओवादीले आफ्नो सदस्य भन्दै आए पनि देवकोटाले भने त्यसलाई स्वीकार गरेका छैनन् । पार्टी अध्यक्ष डा. बाबुराम भट्टराईले माओवादी केन्द्रको चुनाव चिन्हबाट जितेका आफ्ना पार्टीका सदस्यलाई छुट्टै दलको रूपमा अभिलेख गर्ने प्रक्रिया थालिसकेका छन् ।
उक्त पार्टीको निवेदनमाथि निर्वाचन आयोगले टुंगो लगाइसकेको छैन । नेसपाले संघीय संसद् सचिवालयमा पनि नेसपाको सांसदको रूपमा विवरण अभिलेख गरिदिन माग गर्दै निवेदन दिइसकेको छ । उनले नयाँ समीकरणलाई साथ दिएनन् भने सरकार बनाउन झनै सकस पर्छ । प्रदेशको राजनीतिमा अर्को चामत्कारिक घटना नभए गण्डकी मध्यावधि चुनाव उन्मुख छ । सभामुखले बराबर भएको खण्डमा बाहेक मत दिन पाउँदैनन् ।
Related News
सम्बन्धित समाचार
गण्डकीको संसद बैठक २३ गते ३ बजे बस्ने, मुख्यमन्त्री अधिकारी विश्वासको मत लिँदै
मुख्यमन्त्री अधिकारीले २३ गते विश्वासको मत लिने, राप्रपा विपक्षमै
सिद्ध र कालिका क्रिकेटको फाइनलमा
राप्रपाले साथ नदिने भएपछि अधिकारी सरकार संकटमा, अब के होला ?
लाटोकोसेरो संरक्षक राजु आचार्यलाई बेलायतमा अवार्ड
hero news full width
मुख्य समाचार
पाेखरामा कालो धुँवा फाल्ने गाडीका चालक कारवाहीमा
मजदुरलाई छैन मजदुर दिवस रौनक
वैशाख २०, २०८१गण्डकीमा संविधान भर्सेज सर्वोच्च
वैशाख २०, २०८१पोखराको अमरसिंहको बिजुली पसलमा आगलागी, १ करोडको क्षति
वैशाख २०, २०८१गण्डकी प्रदेशमा सत्ता राजनीति : प्रदेश सभा सदस्य ६०, बहुमत ३० ले पुग्ने !
वैशाख १९, २०८१नारायणगढ–बुटवल सडक ३३ किमी कालोपत्रे
वैशाख १९, २०८१