म्याग्दी । कालीगण्डकी नदीमा आएको बाढीले मुस्ताङको सदरमुकाम जोमसोम बजार कटान गर्न थालेको छ ।

कटानका कारण घरपझोङ गाउँपालिका–४ जोमसोमका सरकारी कार्यालय जाने झोलुंगे पुलदेखि माथि मुस्ताङ अस्पतालतर्फ ५० मिटर दूरीमा सडक चिराचिरा परेको गाउँपालिका अध्यक्ष मोहनसिंह लालचनले बताए । ‘११ मिटर फराकिलो सडकको डिलतर्फको करिब आठ मिटर चौडाईमा धाजा फाटेपछि मंगलबार बिहानदेखि यातायात सञ्चालन गर्न रोकेका छौं,’ उनले भने, ‘जोमसोम अस्पतालको भवन र १० भन्दा बढी व्यक्तिका घर जोखिममा परेका छन् ।’ बाढीले ग्याबियन र मेसिनरी पर्खाल भत्काएर बस्तीतर्फ कटान गर्न थालेपछि जोखिम बढेको हो । गाउँपालिकाका अध्यक्ष लालचनले नेपाल प्रहरी र सशस्त्र प्रहरीको टोलीले कटान गरेको ठाउँमा ग्याबियन पर्खाल बनाएर कटान नियन्त्रण र सडक सञ्चालन गर्न खटिएको बताए ।

शनिबार र आइतबार लगातारको झरीका कारण मुस्ताङका खोलामा बाढी आएको छ । बारागुङ मुक्तिक्षेत्र गाउँपालिकाको कागखोलामा आएको बाढीले आइतबार राति कागबेनीमा २९ वटा घरसहित प्रहरी चौकी, वडा कार्यालय, मोटरेबल पुल, झोलुङ्गे पुल, मन्दिर गुम्बा, धर्मशालालगायत भौतिक संरचना बगाएको छ ।
कागखोलाको बाढी मिसिएर जोमसोममा आएको बाढीले कटान गर्न थालेको हो । यसैबीच मुस्ताङको विपद् व्यवस्थापनका लागि म्याग्दी जिल्लाको विपद् व्यवस्थापन समितिले ३ हजार लिटर डिजेल उपलब्ध गराएको छ ।

मुख्यमन्त्री सुरेन्द्रराज पाण्डेको अध्यक्षतामा बसेको प्रदेश विपद् व्यवस्थापन कार्यकारी समितिको अकस्मिक बैठकले राहत व्यवस्थापन र बाढीबाट भत्किएको संरचना व्यवस्थित गर्न मेसिन उपकरण तथा सवारी साधनका लागि मुस्ताङमा इन्धन अभाव भएकाले म्याग्दीबाट डिजेल पठाउने निर्णय गरेको थियो ।

म्याग्दीका प्रमुख जिल्ला अधिकारी तुलसीराम पौडेलले प्रदेश सरकारको निर्देशनअनुसार सोमबार बेनीबाट पठाएको ३ हजार लिटर डिजेल मंगलबार घाँसामा मुस्ताङको विपद् व्यवस्थापन समितिलाई उपलब्ध गराएको बताए ।

बेनी–जोमसोम सडक बैसरीको पहिरोले अवरुद्ध भएकाले घुमाउनेताल–पिप्ले–रानीपौवा–रिसिनचौतारी–माझखर्क–बेगखोला जोड्ने वैकल्पिक सडक प्रयोग गरेर इन्धन पठाएको प्रजिअ पौडेलले बताए । प्रजिअ पौडेलका अनुसार बेनी–जोमसोम–कोरला सडक आयोजनामार्फत साँझसम्म यातायात सञ्चालन गर्ने लक्ष्यसहित बैसरीमा खस्ने पहिरो व्यवस्थापन गर्ने काम भइरहेको छ । म्याग्दीको रघुगंगा गाउँपालिका २ र ३ को सिमानामा पर्ने बैसरी अधेरीखोला क्षेत्रको पहिरोका कारण साउन २० गतेदेखि बेनी–जोमसोम सडक अवरुद्ध हुँदा मुस्ताङमा इन्धनलगायत अत्यावश्यक बस्तुको अभाव भएको छ । रासस