पोखरा । पोखरा २० मौजा स्थित हिमालय माविले स्वर्ण महोत्सव मनाउने भएको छ । २०२८ सालमा स्थापना भएको विद्यालयले फागुन ९, १० र ११ गते विविध कार्यक्रम गरी स्वर्ण महोत्सव मनाउन लागेको विद्यालय व्यवस्थापन समितिका अध्यक्ष एवं स्वर्ण महोत्सव मूल आयोजक समितिका संयोजक सु. हुमबहादुर गुरुङले जानकारी दिए ।

स्वर्ण महोत्सव कार्यक्रमअन्तर्गत फागुन ९ गते उद्घाटनसहित स्थानीय झाँकी प्रदर्शन, विभिन्न जातजातिका भेषभूषासहित सांस्कृतिक कार्यक्रम, शैक्षिक प्रदर्शनी गरिनेछ । फागुन १० गते राष्ट्रिय स्तरका ख्यातिप्राप्त कलाकारबाट सांगीतिक प्रस्तुति रहनेछन् भने फागुन ११ गते अन्तिम दिन विविध सांस्कृतिक कार्यक्रम, स्थानीय आमा समूह, युवा क्लबलगायतका मनोरञ्जनात्मक प्रस्तुतिसहित समापन गरिनेछ । सोही समारोहमा पुरस्कार वितरण तथा सम्मान गरिने तय भएको छ ।