पोखरा । समाजसेवी वीरेन्द्रकुमार बाटाजूको ९४ वर्षको उमेरमा आइतबार निधन भएको छ । पोखरा बगालेटोल निवासी बाटाजूको उपचारको क्रममा फिस्टेल अस्पतालमा निधन भएको हो । उनी केही समयदेखि अस्वस्थ थिए ।

पोखरामा पहिलो एसएलसी उत्तीर्ण विद्यार्थीको रुपमा परिचित बाटाजू राष्ट्रिय माविका पूर्व प्रधानाध्यापक हुन् । गणेश गुठी सेवा समिति पोखरा–४ मा २०५४ देखि अध्यक्ष रहेका उनी विभिन्न सामाजिक क्षेत्रमा सक्रिय थिए । उनको चौरासी पूजाको अवसरमा बाटाजू परिवारबाट वीरेन्द्रदीप प्रतिष्ठान स्थापना भई ५ लाख रुपैयाँको अक्षयकोष राखिएको थियो । उक्त कोषबाट धर्मिक, सामाजिक तथा सांस्कृतिक विकासका कार्यमा टेवा पुग्दै आएको छ ।

स्व. बाटाजूको पोखरा–९ स्थित तुलसीघाटमा सोमबार दाहसंस्कार भएको छ । बाटाजूका २ छोरा रवीन्द्रकुमार, राजेन्द्रकुमार, २ छोरी सागरलक्ष्मी धौमडेल र गीतालक्ष्मी सिंह तथा नाति नातिनी छन् ।

जेठा छोरा रवीन्द्रकुमार मत्स्यविकास कार्यालयका पूर्व अधिकृत हुन् भने कान्छा छोरा राजेन्द्रकुमार लायन्स क्लब अफ ३२५ ‘के’ का गभर्नर हुन् । राजेन्द्र अटो व्यवसायमा आबद्ध छन् ।