हेमजा । गौरीशंकर बहुमुखी क्याम्पसमा शुक्रबार विविध कार्यक्रम गरिएको छ । नवआगन्तुक स्नातक वर्ष वर्षका विद्यार्थीलाई स्वागत, स्नातक चौथो वर्षका विद्यार्थीलाई बिदाइ एवं कक्षा ११ र १२ तर्फका शैक्षिक पुरस्कार वितरण गरिएको हो ।

कार्यक्रममा क्याम्पस सञ्चालक समितिका अध्यक्ष देवकृष्ण पौडेलले अनुशासनपूर्वक ध्यान दिएर पढ्न विद्यार्थीलाई सुझाव दिँदै विदेश जाने मानसिकता त्याग्न आग्रह गरे । उनले पठनपाठनका अलावा विद्यार्थीले सदाचारलाई पनि ख्याल गर्नुपर्ने उल्लेख गरे ।

सञ्चालक समिति उपाध्यक्ष रमा त्रिपाठीले योजना बनाएर पठनपाठन गर्न विद्यार्थीलाई सुझाव दिंदै क्याम्पसको इज्जत रहने गरी शैक्षिक क्रियाकलापमा केन्द्रित बन्न विद्यार्थीलाई सुझाव दिइन् ।

क्याम्पस प्रमुख कृष्णप्रसाद पौडेलले विद्यार्थीको शैक्षिक प्रगतिको कामना गर्दै शैक्षिक उन्नयनमा विद्यार्थीले पनि भूमिका खेल्नुपर्ने जनाए । स्नातक चौथो वर्षका विद्यार्थी विनिता सापकोटाले मेहनत गरी क्याम्पस तथा व्यक्तिगत आफ्नो प्रतिष्ठा बढाउन आग्रह गरिन् । स्नातक प्रथम वर्षकी मञ्जु सुनारले स्वागत गरेकोमा क्याम्पसप्रति आभार प्रकट गर्दै क्याम्पसको शैक्षिक वातावरण सुमधुर बनाउन विद्यार्थीले पनि भूमिका खेल्नुपर्ने जनाइन् । कार्यक्रममा पूर्व क्याम्पस प्रमुख ओमबहादुर कुँवरले सचेतनामूलक कविता पनि प्रस्तुत गरे ।
क्याम्पस प्रमुख पौडेलको अध्यक्षतामा भएको उक्त कार्यक्रममा विभागीय प्रमुख मानबहादुर कार्कीले स्वागत तथा सहायक प्राध्यापक महेश्वर पौडेलले कार्यक्रम सञ्चालन गरे ।