पोखरा । भद्रकाली माविको ७१ औं वार्षिकोत्सवको अवसरमा आयोजित रक्तदानमा ४३ युनिट रगत संकलन भएको छ । पोखरा महानगरपालिका १३ कुँडहरस्थित विद्यालयकै प्रांगणमा बिहीबार कार्यक्रम भएको हो । नेपाल रेडक्रस सोसाइटी प्रादेशिक कार्यालय रक्तसञ्चार सेवा पोखराका प्रमुख अर्जुन ज्ञवालीले पहिलो रक्तदाताद्वय शुक्रराज अधिकारी र शान्ति केसीलाई ब्लड ब्याग दिएर कार्यक्रम उद्घाटन गरे ।

भद्रकाली मावि व्यवस्थापन समिति अध्यक्ष लोकबहादुर कार्कीको अध्यक्षतामा भएको कार्यक्रममा विद्यालयका प्रधानाध्यापक राजेन्द्र भण्डारी लगायत बोलेको कार्यक्रममा सहायक प्रधानाध्यापक लोकचन्द्र खनालले सञ्चालन गरेका कार्यक्रम संयोजक शीला गुरुङले बताइन् ।

यसैगरी वार्षिकोत्सवको अवसरमा शुक्रबार विद्यालय मिनी म्याराथन सम्पन्न भएको छ । सिनियर र जुनियर गरी दुई समूहमा म्याराथन प्रतियोगिता गरिएको प्रतियोगिताका संयोजक पृतमकुमार श्रेष्ठले बताए ।

सिनियर पुरुषतर्फ मानविकी कक्षा १२ मा अध्ययनरत पृतम गुरुङ पहिलो, कक्षा १२ मानविकीका भीमबहादुर गुरुङ दोस्रो र शिक्षा १२ का सन्तोष विक तेस्रो भए । त्यसैगरी जुनियर पुरुषतर्फ कक्षा ९ का आशिष नेपाली पहिलो, कक्षा ८ का सफल नेपाली दोस्रो, र गंगाबहादुर गुरुङ तेस्रो भए । महिलातर्फको म्याराथनमा कक्षा ११ शिक्षामा अध्ययनरत बालकुमारी विक पहिलो, कक्षा ९ की रिया तमाङ दोस्रो र कक्षा ६ की अप्सरा गुरुङ तेस्रो भइन् । दुवैतर्फ पहिलो, दोस्रो र तेस्रो हुनेलाई क्रमश ३ हजार र २ हजार र एक हजार, प्रमाणपत्र र मेडल प्रदान गरिएको संयोजक श्रेष्ठले बताए ।

भद्रकालीले फागुन ८ गते गण्डकीका मुख्यमन्त्री खगराज अधिकारीको प्रमुख आतिथ्यतामा ७१ औं वार्षिकोत्सव तथा अभिभावक दिवस मनाउँदैछ ।