नवलपुर । गण्डकी प्रदेशका मुख्यमन्त्री कृष्णचन्द्र नेपाली पोखरेलले पूर्वी नवलपरासीस्थित देवचुली नगरपालिकाको बुधबार प्रशासनिक भवन उद्घाटन गरेका छन् । साथै उनले देवचुली नगरपालिका प्रगतिनगर खानेपानी टंकी ओभर हेडको पनि उद्घाटन गरे ।
सो अवसरमा मुख्यमन्त्री पोखरेलले अघिल्लो सरकारको ऋणका कारण अहिलेको सरकारले विकास गर्न नपाएको दाबी गरे । उनले आफूहरुले अघिल्लो सरकारको कामलाई पनि प्राथमिकतामा राखेर काम गरेको बताए ।
उनले देशमा संघीयता आइसके पनि बजेट विनियोजनमा केन्द्रिकृत प्रणाली कायम रहेकोले स्थानीय तहको क्षेत्रमा सोचे जस्तो विकास हुन नसकेको बताए । बजेटलाई संघीय सरकारले ५०÷५० प्रतिशतमा लैजानु पर्ने उनको जोड छ ।
मुख्यमन्त्री पोखरेलले देश संघीयतामा गएपछि जनताले केही अधिकार पाए पनि देशमा राज्य सञ्चालन हिसाबले प्रदेश र स्थानीय सरकारले संघीयताको आभाष गर्न नपाएको बताए । उनले त्रिवेणी कोरला सडक गण्डक प्रदेशको ‘लाइफलाइन’ सडक भएको बताउँदै त्यसलाई आफ्नो पालामा अगाडि बढाएको जिकिर गरे । उनले यस वर्ष उक्त बाटो निर्माणका लागि ठेक्का गई सकेको जनाउँदै अब छिट्टै सडक निर्माण सकिने बताए ।
कार्यक्रममा संविधानसभा सदस्य कृष्ण पौडेल, गण्डकी प्रदेशसभा सदस्य रोशन गाहाले गण्डकी प्रदेशको अहिलेको सरकारले नेकपा एमाले नेतृत्वको सरकारले गरेका काम लुकाएको आरोप लगाए । देवचुली नगरपालिकाका नगर प्रमुख पूर्णकुमार श्रेष्ठको अध्यक्षतामा भएको कार्यक्रममा तीलप्रसाद काफ्ले, खिमानन्द भुसाललगायत बोलेका थिए ।