पोखरा । पोखरा २०, मौजास्थित हिमालय माविको ५० औं वार्षिकोत्सव, अभिभावक भेला तथा पुरस्कार वितरण समारोह भएको छ ।
वडाध्यक्ष सिमबहादुर गुरुङले समारोह उद्घाटन गर्दै विद्यालयको शैक्षिक गुणस्तर विकासमा शिक्षक, विद्यार्थी र अभिभावकको महत्वपूर्ण भुमिका रहने बताए । उनले विद्यालयको प्रगतिको लागि शैक्षिकस्तर सुदृढ हुनुपर्नेमा जोड दिए । आगामी वर्षदेखि १० जोड २ कक्षा सञ्चालनसँगै अंग्रेजी माध्यमबाट कक्षा सञ्चालन गर्ने तयारी रहेको जनाए ।
मौजा विजयपुर युके समाजका अध्यक्ष रामकुमार गुरुङले विदेशमा बसेर पनि आफ्नो विद्यालयको शैक्षिक भौतिक उन्नतिमा सबै प्रकारका सहयोग गर्दै आएको बताए ।
विद्यालय व्यवस्थापन समितिका अध्यक्ष सु. हुमबहादुर गुरुङको अध्यक्षतामा भएको कार्यक्रममा प्रअ मणिराज परियारले विद्यालयको वार्षिक प्रगति प्रतिवेदन पेस गरेका थिए ।
कार्यक्रममा शिक्षक महासंघ कास्की अध्यक्ष बोधराज पौडेल, शिक्षक अभिभावक संघका अध्यक्ष काशीराम गुरुङ, विद्यालय सल्लाहकार समिति संयोजक तीलबहादुर गुरुङ, अक्षयकोष संस्थापक खिमबहादुर गुरुङ, वडा सदस्य भीमप्रसाद बास्तोला, एमाले वडाध्यक्ष त्रिलोचन गौतम लगायतले शुभकामना मन्तव्य राखेका थिए ।
कार्यक्रममा शिक्षक डोलराज रेग्मी र छात्रा आशिका परियारले स्वागत मन्तव्य राखेका थिए भने शिक्षिका देवीकुमारी थापाले कार्यक्रम सञ्चालन गरेकी थिइन् । सो अवसरमा उत्कृष्ट विद्यार्थीलाई पुरस्कार वितरण गरिएको थियो ।