पोखरा । एउटा अध्ययनले विश्वमै सबैभन्दा छिटो तापक्रम वृद्धि भएका ठाउँमध्ये गण्डकी प्रदेशको मुस्ताङलाई पनि अद्यावधिक गरेको छ । अरु ठाउँमा १ सय वर्षमा हुने तापक्रम मुस्ताङमा १० वर्षमै बढ्छ । गण्डकी प्रदेश जलवायु परिवर्तनका हिसाबले निकै जोखिमपूर्ण अवस्थामा छ । हिमताल फुट्ने, हिमपहिरो झर्ने लगायत समस्या आजभोलि निकै बढेका छन् । मानवीय अतिक्रमणले सिमसार पुरिनेक्रम दैनिक बढिरहेको छ । सिमसार र जलवायु परिवर्तन एकआपसमा सम्बन्धित छन् । जलवायु परिवर्तनका कारण सिमसार लोप हुँदै छन् भने सिमसार लोप भएका कारण परिस्थितिकीय प्रणाली हुँदै जलवायुमा समेत असर गरेको छ ।
पोखराका सिमसार जोगाउन र योजनाबद्ध विकासका लागि सन् २०१६ मा यहाँका सिमसारलाई रामसार सूचीमा सूचिकृत गरिएको छ । तर त्यसपछि न तालको आकार बढेको छ न त अतिक्रमण हुन रोकिएको छ । वर्षेनी तालको आकार घट्दै जाँदासमेत सरोकारवालाहरु सचेत छैनन् । सिमसारमाथिको दोहनले जलचर प्राणीहरु पोखराबाट बसाइँ सर्ने अवस्थामा रहेका चराका जानकारहरु बताउँछन् । विशेषतः सिमसारमाथिको अतिक्रमण र जथाभावी संरचना निर्माणले पारिस्थितिकीय प्रणालीमै परिर्वतन आएको छ ।
तालहरुलाई ड्याम बनाएर बाँध्ने र ताल किनारमा सिमेन्ट र ढुंगाको पैदलमार्ग बनाउने तथा सिमसार पुरेर घरहरु ठड्याउने चलन निकै बढेको छ । केही वर्षअघि आइयुसिएनले गरेको एउटा प्रतिवेदन अनुसार १ सय १० वर्ग किलोमिटर क्षेत्रफल रहेको फेवातालको पानी ढलोमा ३ सय ३० किलोमिटर लामो सडक बनिसकेको छ । अहिले त्यो तथ्यांक झनै बढेको छ । जति विकास विस्तार भयो उत्ति नै परम्परागत प्रणाली बिग्रिएको छ । फेवातालमा पोहोर र अहिलेको गणनामा मेन्डारिन हाँस देखियो । त्यसअघि यहाँ मेण्डारिन थिएन । फेवाबाहेक अरू तालमा यो प्रजाति पाइँदैन । तर फेवामा पाइने धेरै प्रजातिका चराहरूको संख्या भने ह्वात्तै घटेको गणनाले देखाउँछ । धेरै चरा चर्न आउने भएकोले पोखराको दीपाङ ताललाई ‘हनिमुन लेक’ भनेर चिनिन्छ । दर्जनौं प्रजातिका चरा भेटिने यहाँ अहिले २/४ प्रजातिमात्रै छन् ।
धेरै चरा चर्न आउने भएकोले दीपाङ ताललाई ‘हनिमुन लेक’ भनेर चिनिन्छ
डुबुल्की हाँस, सिलसिला हाँस, जलेवा र बकुल्लाका प्रजाति बाहेक अरू चराहरू दिपाङमा देखिन छोडे । हालै गरिएको अध्ययनले पोखरामा ४६ प्रजातिका नयाँ चराहरू फेला पारेको छ । तथापि सिमसारमा भइरहेको दोहनले पोखराको रैथाने चरा भने बिस्तारै घट्न थालेका छन् । स्वर्णचुल राजचिचिल्कोटे ४५ वर्षपछि पोखरामा भेटिएको छ । राष्ट्रियस्तरमै संकटग्रस्त अवस्थामा रहेको उक्त चरा सन् १९७७ मा वरिष्ठ चराविद् हरिशरण नेपाली काजीले रुपाताल क्षेत्रमा भेटेका थिए । नयाँ चरा देखिनु र पुराना चराहरु हराउनु नै जलवायु परिवर्तनको सूचक हो ।
सन् २०१९ सम्म पोखरा उपत्यकामा ४ सय ६७ प्रजातिको चरा सङ्गृहीत गरिएको छ भने यो वर्षको अध्ययन अनुसार ४ सय ८५ प्रजाति पुगेका छन् । तथ्यांकले केही प्रजाति बढेको देखाए पनि मान्छेहरूले सिमसारमाथि गरेको अतिक्रमणले रैथाने प्रजातिको बसाइँसराइ तीव्र रूपमा बढेको छ । एउटा तालबाट अर्को तालमा सर्ने तथा केही चराहरुले विस्तारै पोखराबाट बासस्थान सार्ने गरेको अध्ययनहरुमा उल्लेख छ । पन्छी समाज पोखराका अध्यक्ष तथा अध्ययनकर्ता मनशान्त घिमिरे चराको संख्या घट्दै जाँदा मानव जातिको भविष्यमै प्रश्न उठ्ने बताउँछन् । ‘चराको आहारा घटेका छन् । त्यसको मुख्य कारण सिमसार पुरिनु हो । पोखराका तालहरुमा विकास निर्माणका काम भइरहेका छन् । दलदले भूमि पुरिएको छ,’ उनले भने, ‘अहिले पानी चराहरु पोखराकै एउटा तालबाट अर्को तालमा सरिरहेका छन् । भोलि पोखराबाटै सरेर जाने अवस्था आउन सक्छ । त्यो समय निकै दुखद हुनेछ ।’
चराजस्तै सिमसार क्षेत्रका रैथाने जातिहरु समेत लामो समय त्यहाँ बस्न नसक्ने अवस्थामा पुगेका छन् । कास्कीका जिल्ला वन अधिकृत केदार बरालका अनुसार धेरै रैजाने जनजातिहरुको दैनिकीमा यसले असर पुगेको छ । ‘जलवायु परिवर्तनले सिमसार सुकेको छ । जैविक विविधता मरेर गएको छ । इको–सिस्टममा नकारात्मक असर गरेको छ,’ उनले भने, ‘अन्य क्षेत्र भन्दा सिमसार ५ गुणा उत्पादनमूलक हुन्छ । वर्षेनी यी क्षेत्र घट्दा सिमसारलाई जीविकोपार्जन बनाएर बाँचेका जनजातिको जीवनमा असर परेको छ ।’ उनले सिमसार संरक्षणका लागि छुट्टै प्राधिकरण आवश्यक रहेको बताए । ‘सिमसार हेर्न धेरै सरकारी निकायमा जिम्मेवारी बाँडिएको छ । अर्कोले गर्ला भन्ने आशमा कसैले जिम्मेवारी लिएको छैन । आपसी समन्वय छैन,’ बराल भन्छन्, ‘त्यसका लागि शक्ति सम्पन्न सिमसार क्षेत्र संरक्षण प्राधिकरण गठन गरेर कानुनी संयन्त्र बनाएर कडाइ साथ कार्यान्वयन गर्नुपर्छ ।’ विश्व रामसार सूचीमा कास्कीका ९ ताल सूचिकृत छन् ।
Related News
सम्बन्धित समाचार
मुख्यमन्त्री अधिकारीले २३ गते विश्वासको मत लिने, राप्रपा विपक्षमै
सिद्ध र कालिका क्रिकेटको फाइनलमा
राप्रपाले साथ नदिने भएपछि अधिकारी सरकार संकटमा, अब के होला ?
लाटोकोसेरो संरक्षक राजु आचार्यलाई बेलायतमा अवार्ड
पाेखरामा कालो धुँवा फाल्ने गाडीका चालक कारवाहीमा
hero news full width
मुख्य समाचार
मजदुरलाई छैन मजदुर दिवस रौनक
गण्डकीमा संविधान भर्सेज सर्वोच्च
वैशाख २०, २०८१पोखराको अमरसिंहको बिजुली पसलमा आगलागी, १ करोडको क्षति
वैशाख २०, २०८१गण्डकी प्रदेशमा सत्ता राजनीति : प्रदेश सभा सदस्य ६०, बहुमत ३० ले पुग्ने !
वैशाख १९, २०८१नारायणगढ–बुटवल सडक ३३ किमी कालोपत्रे
वैशाख १९, २०८१सहकारी ठगीमा राप्रपाका सांसदसहित १४ जना विरुद्ध पक्राउ पूर्जी
वैशाख १८, २०८१