पोखरा । पोखरा वडा १३ कार्यालयद्वारा आयोजित टोल विकास संस्थास्तरीय वक्तृत्वकला प्रतियोगितामा कुँडहर टोलअन्तर्गत बाल कल्याण आमा समूहकी पार्वती सिग्देल प्रथम भएकी छिन् । जनकल्याण समाज काहुँखोलामा भएको प्रतियोगितामा वडाका ५७ टोल विकास संस्था, आमा समूह लगायत संघसंस्थामध्ये १५ जनाले भाग लिएका थिए ।
प्रतियोगितामा मिजार समाज पोखरा १३ की राधा नेपाली दोस्रो र हिमाली टोल विकास समितिकी अमरावती सुवेदी तृतीय भए । नवदुर्गा टोल विकासकी धनकुमारी गुरुङ सान्त्वना भइन् ।
‘कोभिड १९ महामारीबाट मानवजातिले सिक्नुपर्ने पाठ’ शीर्षकमा वकृत्वकला प्रतियोगितामा शान्ति गुरुङ, तारा माया थापा र पार्वती पौडेल निर्णायक थिए ।
वडाध्यक्ष दर्शन लामाले विजयीलाई नगद पुरस्कार तथा प्रमाणपत्र वितरण गर्दै कोभिड १९ ले पारेको असर र यसबाट बच्ने उपायका लागि सचेतनास्वरुप सो प्रतियोगिता भएको बताए । महानगरपालिका र वडाले विशेष कार्यक्रम ल्याएको र सबै मिलेर नै यसबाट बच्ने कार्यमा लाग्न आग्रह समेत गरे ।
पत्रकार श्रीराम सिग्देलले महिलाको क्षमता अभिवृद्धिमा वकृत्वकलाले अगाडि बढ्न सघाउ पुग्ने बताए ।वडा सदस्य कृष्णकुमारी गुरुङको अध्यक्षमा भएको कार्यक्रममा अर्का वडा सदस्य कमला बिकले स्वागत र समाजसेवी इन्दिरा आचार्यले सञ्चालन गरेकी थिइन् ।