पोखरा । छिमेकी मुलुक चीनबाट बिहीबार कोरोना भाइरसविरुद्धको खोप ‘भेरोसेल’ ८ लाख मात्रा प्राप्त भएको छ । चीनसँग खरीद गरिएको खोप नेपाल वायुसेवा निगमको वाइडबडी जहाजबाट बिहीबार खोप ल्याइएको स्वास्थ्य तथा जनसंख्या मन्त्रालका सहप्रवक्ता डा समीरकुमार अधिकारीले बताए । ल्याइएको खोप टेकुस्थित स्वास्थ्य सेवा विभागको चिस्यान केन्द्रमा राखि देशभरि पठाइने उनले बताए ।
उनले निगमको नियमित उडानमार्फत लगातार ४ दिनसम्म खोप चीनबाट आउने जानकारी दिए । साउन १५ सम्म ३२ लाख मात्रा खोप नेपाल आउने मन्त्रालयले जनाएको छ । अहिलेसम्म ७३ लाख ८२ हजार ८ सय ५० मात्रा खोप आइसकेको छ ।
यसैबीच, एसियाली विकास बैंक (एडिबी) ले कोभिड–१९ विरुद्धको खोप किन्न नेपाललाई १९ अर्ब ८० करोड रुपैयाँ ऋण प्रदान गर्ने भएको छ । बैंकले ६८ लाख नेपाली लाभान्वित हुने गरी १ करोड ५९ लाख मात्रा खोप खरिद गर्न उक्त रकम ऋणस्वरुप नेपाल सरकारलाई उपलब्ध गराउने निर्णय बिहीबार गरेको मनिलास्थित बैंकको प्रधानकार्यालयले जनाएको छ ।
आफ्ना नागरिकलाई संक्रमणबाट बचाउन शीघ्र खोप खरिद अनिवार्य रहेको बताउँदै बैंकका अध्यक्ष मासाटुगु आशाकावाले अर्थतन्त्रलाई पुनर्जीवन दिन नेपालका निम्ति खोप उपयोगी हुने विश्वास व्यक्त गरे ।