पोखरा । नेपाल खेलकुद पत्रकार मञ्चद्वारा आयोजित पाँचौं पोखरा स्पोर्टस् अवार्ड–२०७६/०७७ को लाइफ टाइम अचिभमेन्ट अवार्डको लागि प्रायोजन सम्झौता भएको छ ।

पोखरा लेकसिटीका निर्देशक डा. विष्णु नेपाली र मञ्च अध्यक्ष एकराज गिरीबीच सहमतिपत्रमा बिहीबार सम्झौता भएको हो । जसअनुसार डा. नेपालीले सम्झौतावापत ४० हजार रुपैयाँ प्रदान गर्ने छन् ।

खेल गतिविधिले मानव स्वास्थ्यमा सहयोग पुग्ने उल्लेख गर्दै डा. नेपालीले मञ्चले आयोजना गरेको स्पोर्टस् अवार्ड सबैको लागि महत्वपूर्ण रहेको बताए ।

मञ्च अध्यक्ष गिरीले स्पोर्टस् अवार्डमा सहयोगदाता रुपमा जोडिएकोमा आभार व्यक्त गर्दै सम्पूर्णको सहयोगबाट अवार्ड सभ्य र भव्य रुपमा सम्पन्न गर्न मद्दत मिल्ने बताए ।

गत साता माई होटल पोखराले उत्कृष्ट उदियमान खेलाडीलाई प्रदान गरिने २५ हजार रुपैयाँ प्रायोजन गरिसकेको छ । होटलका प्रबन्ध निर्देशक तोरणबहादुर बानियाँले प्रायोजन सम्झौता गरेका थिए ।

गण्डकी प्रदेशकै गौरव पोखरा स्पोर्टस् अवार्डमा यसपालि विभिन्न ७ विधामा अवार्ड प्रदान गरिनेछ । मञ्चले आगामी वैशाख २० मा लाइफटाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, उदियमान खेलाडी, उत्कृष्ट प्रशिक्षक, उत्कृष्ट खेल संघ, उत्कृष्ट खेल पत्रकारिता अवार्डमा नगदसहित अवार्ड वितरण गर्नेछ ।