नवलपरासी । देवचुली नगरपालिकाको अधिकांश गाउँमा शुद्ध पिउने पानी पुगेको छ । योसँगै बिहान ४ बजे उठेर पधेँरो, कुवा, मुहान धाउनु पर्ने बाध्यताको अन्त्य भएको छ ।

स्थानीय, प्रदेश सरकार र संघीय सरकारको विभिन्न योजनाबाट खानेपानी आयोजना सम्पन्न भएको हो । कुनै बेला चुवाडी र कुवाको पानी खान बाध्य देवचुली नगरपालिकाका पहाडी तथा विकट गाउँमा पनि अहिले धाराबाट घरघरमा शुद्ध पिउनेपानी पुगेको हो ।

देवचुलीमा ४० हजार बढी जनसंख्या छ भने १० हजार बढी घरधुरी छन् । अहिले अधिकांश घरका धाराबाट शुद्ध खानेपानी आपूर्ति भएको छ । देवचुली नगरपालिकाको प्रगतिनगर, रजहर, दलदले जस्ता मुख्य बजारमा मात्र नभएर कीर्तिपुर, मुण्डे, बन्दीपुर जस्ता विकट गाउँमा पनि शुद्ध पिउने पानी पुगेको हो ।

नगरभित्रका खानेपानी आयोजनामध्येको ठूलो आयोजना प्रगतिनगर खानेपानी आयोजना हो ।

यहाँ दिव्यपुरी, रहजर, आँपचौर, बरडाँडी, देवचुली, कुमसोद, बन्दीपुर, प्रगतिनगर खानेपानी आयोजना लगायत आयोजना सञ्चालित छन् । करिब २५ वर्षदेखि सञ्चालित खानेपानी आयोजना भए पनि अहिले नगरपालिकाको पहलमा सबै खानेपानी आयोजना मर्मत तथा गुणस्तरको लागि नगरपालिकाले ठूला आयोजनालाई प्राथमिकता दिएको देवचुली नगरपालिकाका नगर उपप्रमुख पार्वता तिवारीले बताइन् ।

नगरभित्रका खानेपानी आयोजनामध्येको ठूलो आयोजना प्रगतिनगर खानेपानी आयोजना हो । यसले देवचुलीका ८ वटा वडाका ४५ सय बढी घरधुरीलाई पानी आपूर्ति गरेको प्रगतिनगर खानेपानी आयोजना तथा सरसफाइ उपभोक्ता संस्थाका अध्यक्ष खिमानन्द भुसालले बताए ।

अहिले देवचुलीका पहाडी तथा विकट क्षेत्र कृतिपुर लगायत केही क्षेत्रमा सामूहिक धाराबाट खानेपानी उपलब्ध भइरहेको भए पनि त्यो समस्या पनि १ वर्षभित्र अन्त्य भएर अबको १ वर्षमा बाँकी सबै क्षेत्रमा ‘एक घर एक धारा’ पु¥याउने देवचुली नगरपालिकाको योजना छ ।

नेपालकै पहिलो खुला दिसामुक्त क्षेत्र घोषित देवचुली नगरपालिका अहिले अन्य पूर्वाधारको क्षेत्रमा पनि बिस्तारै फड्को मार्दैछ । जसको सूचीमा खानेपानी आयोजनामा पनि पर्दछ ।