पोखरा, २७ असोज । पोखरा चेम्बर अफ कमर्स कास्कीले संघीयतामा समृद्धि स्मारिका–२०७७ प्रकाशन गरेको छ ।

चेम्बर दिवस २०७७ तथा नेपाल चेम्बर अफ कमर्सको वर्ष प्रवेशको अवसरमा प्रकाशित स्मारिकाको गण्डकी प्रदेशका मुख्यमन्त्री पृथ्वीसुब्बा गुरुङले मंगलबार विमोचन गरे । मुख्यमन्त्री गुरुङले संघीयतासंगै चेम्बर पोखरा आइपुगेको बताए ।

संघीयतालाई आत्मसाथ गर्दै विधान संशोधन गरी चेम्बरले संघ, प्रदेश र स्थानीयतहसम्म संगठन विस्तार गरेको उल्लेख गर्दै उनले सबैठाउँमा प्रतिनिधित्व र पहुँच बढाउन बढाउन ध्यान दिन सुझाव दिए ।

प्रतिस्पर्धी क्षमता तथा भूमिका बढाएर राज्यले सिफारिस गर्ने ठाउँमा संस्थालाई पुर्‍याउन आग्रह गर्दै उनले सक्रियता र गतिविधिले संस्था सबैले सम्झने ठाउँमा पुग्न सक्ने धारणा राखे । ‘स्वच्छ प्रतिस्पर्धामा जसले राम्रो काम गर्छ उसलाई उद्योगी व्यवसायीले पत्याउछन,’उनले भने, ‘प्रदेश सरकारको नीति निर्माण र लगानी प्रवद्र्धनमा निजीक्षेत्रसंग सहकार्य गरिने छ ।’ उनले निजी क्षेत्र र प्रदेश सरकारको सहकार्य र साझेदारीमा गुणात्मक प्रगति हासिल गर्न सकिने बताए ।

गण्डकी प्रदेशका नीति तथा योजना आयोगका उपाध्यक्ष डा गिरीधारी शर्माले अवको समयमा उत्पादकमुलक अर्थतन्त्र निर्माणमा लाग्नु पर्ने बताए ।

कार्यक्रममा पोखरा चेम्बर अफ कमर्स पोखराका अध्यक्ष किसान सुनारले गण्डकी प्रदेशको समृद्धिसंग जोडेर स्मारिका प्रकासन गरेको बताए । पोखरा चेम्बर अफ कमर्स कास्कीका वरिष्ठ उपाध्यक्ष तथा स्मारिका प्रकाशन समितिका संयोजक गिता तिवारी गौतम, महासचिव उमराज बास्तोला लगायतले बोलेका थिए ।