पोखरा, १८असाेज । कँरेत सर्पले टोकेपछि उपचारार्थ अस्पताल भर्ना भएका मादी गाउँपालिका वडा–६ का १४ वर्षीय विशाल पौडेलको उपचारार्थ आर्थिक सहयोग गरिएको छ ।

उनको गण्डकी अस्पतालमा २० दिनसम्म भेन्टिलेटरमा राखेर उपचार भएकोमा स्वास्थ्यमा सुधार नआएपछि थप उपचारार्थ २ साताअघि काठमाडाै रेफर गरिएको थियो ।

पारिवारिक स्थिति कमजोर रहेकोले उपचार सहयोगार्थ अभियन्ता श्रीराम गौतम, खेमबहादुर जिसी, रवि क्षेत्री, सन्तोष अधिकारी लगायतले आर्थिक संकलन थालेका हुन् ।

सोही क्रममा मादी–६ का खेमबहादुर जिसी नेतृत्वमा स्वदेश तथा विदेशमा समन्वय गरी कतारबाट वविता जिसी, स्टोनियाबाट श्याम जिसी, तनहुँ युएई सम्पर्क समाजका राजन जिसी, यूएईबाट दीपक रानाभाटबाट संकलित रकम विशालका दाजु विजयलाई ३ लाख ८७ हजार ४ सय ३८ रुपैयाँ बराबरको नगद तथा चेक प्रदान गरियो ।

यसअघि, सन्तोष श्रेष्ठले १० हजार र श्रीराम गौतमले ५ हजार रुपैयाँ सहयोग गरेका थिए । उनीहरुकै पहलमा अमेरिकाको वाल्टिमोर बस्ने नेपाली दाजुभाइले, इष्टमित्र तथा शुभचिन्तकले १ लाख रुपैयाँ संकलन गरी पठाएका छन् । विशाललाई नयाँ जीवन दिन सबैजनाले सानै सहयोग भए पनि गरिदिन आह्वान गरिएको छ । विशालको स्वास्थ्यमा हाल क्रमिक सुधार भइरहेको श्रीराम गौतमले बताए ।