पोखरा, १७ असाेज । ‘गण्डकी यूथ स्पीकर–२’ को उपाधि स्याङ्जा वालिङकी राधा पंगेनीले हात पारेकी छन् ।

जेसीज सप्ताहन्तर्गत पोखरा जेसिजको आयोजनामा भर्चुअलमार्फत शुक्रबार भएको ‘असल समाजका लागि युवा नेतृत्व’ विषयक वक्तृत्वकला प्रतियोगितामा १२ प्रतिष्पर्धीलाई पछि उनले उपाधिसहित ५ हजार रुपैयाँ जितेकी हुन् ।

प्रतियोगितामा पोखराकी मीना पराजुली र रामेछापका कौशल कार्की क्रमशः दोस्रो र तेस्रो हुँदै ३ हजार र २ हजार जितेको प्रमुख निर्णायक ज्ञानेन्द्र कोइरालाले बताए ।

जेसिजले सप्ताहव्यापी कार्यक्रमअन्तर्गत कोरोनाविरुद्ध सचेतना, खेलकुद, स्वास्थ्य तथा खाद्यसामग्री वितरण तथा महिलालाई सेनेटरी प्याड बनाउने तालिम सम्पन्न गरिसकेको छ । वकृत्वकला छैटौं दिनको कार्यक्रम थियो ।

जेसिजका अध्यक्ष शिवप्रसाद सापकोटाले जेसिजले युवामा नेतृत्व विकासका साथै सामाजिक कार्यमा समेत अग्रसर गराउन प्रेरित गर्दै आएको बताए ।

कार्यक्रम संयोजक मीनराज खड्काले सप्ताहव्यापी कार्यक्रमले समाजप्रति नागरिकको दायित्व बुझ्न सहयोग मिलेको बताए ।