पोखरा । पोखराको बुद्ध विशाल बजारमा कोरोना संक्रमित देखिएपछि सिल गरिएको भन्ने समाचारप्रति बुद्ध विशाल बजार ब्यापारिक एशोसिएसनले आफ्नो गम्भीर ध्यानाकर्षण भएको जनाएको छ ।

एशोसिएसन अध्यक्ष केशव खत्रीद्वारा बुधबार जारी विज्ञप्तिमा भनिएको छ, ‘कोरोना संक्रमित दम्पती पोखरा ९ का वासिन्दा रहेको र उहाँहरु वडाको निगरानीमा एक हप्तादेखि नै होम क्वारेन्टिन बस्दै आउनुभएको हो । मानिसको बढी मानिसहरु भीडभाड हुने स्थानहरु उच्च सावधानी अपनाउनुपर्ने भएको हुँदा पोखरामा निषेधाज्ञाको अघिल्लो दिनदेखि नै पोखरा वडा ४ को आग्रह र व्यवसायी साथीहरुको सल्लाहमा स्वतःस्फूर्त व्यापारिक सटरहरु बन्द गरिएको हो । विशाल बजार क्षेत्रलाई सिल गरिएको भन्ने समाचारमा कुनै सत्यता छैन ।’

खत्रीका अनुसार विश्वभर महामारीरुपमा देखिएको कोरोना भाइरसको प्रकोपबाट सतर्क रहन आफ्ना सदस्यलाई आग्रह गर्दै एशोसिएसनले विशाल बजारका सम्पूर्ण शौचालयमा ह्याण्डवास, मुख्य गेटमा हात धुने, ज्वरो नाप्ने, माक्स लगाउने, सेनेटाइजर लगाउने व्यवस्था गरेको छ ।