गण्डकीमा कोरोना संक्रमितमध्ये कुल १६ जना निको भइ घर फर्केका छन् । गण्डकी स्वास्थ्य निर्देशनालयले शनिबार विज्ञप्ति जारी गरी थप ५ जना निको भइ घर फर्केको जनाएको हो । यसअघि ११ जना डिस्चार्ज भैसकेका थिए।

नवलपरासी (बर्दघाट सुस्तापूर्व) कावासोती नगरपालिका १२ का २६ वर्षीय पुरुष शनिबार डिस्चार्ज भएका छन् । कोरोना संक्रमण पुष्टि भएपछि उनलाई मध्यबिन्दु अस्पतालको आइसोलेसन कक्षमा राखी उपचार गरिँदैआएकोमा अस्पतालले डिस्चार्ज गरेको हो।

यस्तै, बागलुङ तमानखोला गाउँपालिका वडा ३ का २१ वर्षीय २ जना पुरुषहरु पनि निको भइ घर फर्किएका छन् । उनीहरुको बागलुङस्थित धौलागिरि अस्पतालमा उपचार हुुँदैआएको थियो।

काठमाडौंको ह्याम्स अस्पतालमा उपचारक्रममा कोरोना पुष्टि भएका पोखरा ८ निवासी ६० वर्षीय पुरुष पनि निको भएका छन्।

उता, गोरखा आरुघाट गाउँपालिका वडा २ का २५ वर्षीय पुरुषलाई पनि कर्णाली स्वास्थ्य विज्ञान प्रतिष्ठान जुम्लाले डिस्चार्ज गरेको छ । कोरोना देखिएपछि उनी कर्णाली स्वास्थ्य विज्ञान प्रतिष्ठानमा उपचार गराइरहेका थिए।

प्रदेशमा १ सय ९७ जनामा कोरोना संक्रमण पुष्टि भएको छ

शनिबारसम्म प्रदेशमा १ सय ९७ जनामा कोरोना संक्रमण पुष्टि भएको छ । शनिबारमात्र ५ नयाँ संक्रमित देखिएका हुन्।

हालसम्म ८ हजार १ सय ५० को नमुना संकलन गरिएकोमा २ हजार ५ सय २२ जनाको रिपोर्ट आउन बाँकी छ । प्रदेशमा स्याङ्जा वालिङका १ पुरुषको कोरोनाकै कारण मृत्यु भएको छ । पश्चिमाञ्चल क्षेत्रीय अस्पतालको प्रयोगशालामा पीसीआर चेक गरिएकामध्ये ५ हजार ४ सय ३१ को रिपोर्ट नेगेटिभ आएको छ।