पोखरा, १८ जेठ । तनहुँ जिल्लामा पनि कोरोना संक्रमणका बिरामी भेटिएका छन् । योसँगै गण्डकी प्रदेशका ११ जिल्लामध्ये ६ जिल्लामा कोरोना फैलिएको छ ।

गण्डकी प्रदेश स्वास्थ्य निर्देशनालयका अनुसार तनहुँको ऋषिङ गाउँपालिकाका २८ वर्षीय पुरुषमा कोरोना संक्रमण पुष्टि भएको हो । पोखरा स्वास्थ्य विज्ञान प्रतिष्ठानको प्रयोगशालामा गरिएको परीक्षणमा उनलाई कोरोना संक्रमण भेटिएको हो । ती युवक आफ्नौ ऋषिङ गाउँपालिकाको क्वारेन्टाइनमा बस्दै आएका थिए ।

यस्तै, स्याङ्जामा समेत आइतबार थप २ जना पुरुषमा कोरोना संक्रमण भेटिएको गल्याङ नगरपालिकाका घर भइ स्थानीय क्वारेन्टाइनमा बस्दै आएका वर्ष २७ र वर्ष ४० का पुरुषमा कोरोना संक्रमण भेटिएको गण्डकी प्रदेश स्वास्थ्य निर्देशनालयले विज्ञप्तिमार्फत जानकारी दिएको हो ।

संक्रमित बिरामीहरुलाई उपचारका लागि सम्बन्धित जिल्लाको अस्पतालमा लैजाने तयारी भइरहेको जनाइको छ । गण्डकीमा हालसम्म संक्रमितको संख्या २४ पुगेको छ । तीमध्ये ३ जना निको भइ घर फर्केका छन् ।

गण्डकी प्रदेशमा पहिलो पटक चैत दोस्रो साता कोरोना भाइरस भेटिएको हो । चैत ४ मा कतार एयरवेज आएकी १९ वर्षीया बागलुङकी युवतीमा चैत १२ मा कोरोना पुष्टि भएको हो । बागलुङ सहित क्रमशः नवलपुर, लमजुङ, स्याङ्जा, म्याग्दी र तनहुँमा कोरोना भेटिएको हो । प्रदेश राजधानी पोखरा रहेको कास्की जिल्लामा भने हालसम्म कोरोना नभेटिनुलाई सुखद संयोग मानिँदैआएको छ ।