पोखरा महानगरपालिकाको शैक्षिक प्रशासन महाशाखाले पोखरा महानगर क्षेत्रका विद्यालयलाई सूचना जारी गर्दै भोलि  मंगलबार गुरुङ समुदायको ट्होटें पर्व मनाउनका निम्ति बिदा दिन अनुरोध गरेको छ । अनुरोध अनुसार पोखराका विद्यालयहरुले विद्यार्थीलाई भोलि बिदा हुने सूचना दिएका छन् । केहि विद्यालयहरुले भने आफ्नो वार्षिक क्यालेण्डरमै ट्होटें पर्वको लागि स्थानीय बिदा दिइसकेका थिए । महानगरपालिकाको शिक्षा नियमावली २०७४ को नियम ६६ को उपनियम ३ मा विद्यालय स्वयंले एक शैक्षिक सत्रमा ५ दिनसम्म स्थानीय बिदा दिन सक्ने व्यवस्था छ । सोहि व्यवस्था बमोजिम उक्त पर्व मनाउन बिदा दिन अनुरोध गरिएको हो । तमुधि नेपाल केन्द्रिय कार्यालय, पोखराले लोप हुन लागेको पर्वलाई संरक्षण गर्नका लागि स्थानीय बिदा दिन महानगरलाई अनुरोध गरेको थियो । यस्तै जनैपूर्णिमाको दिन साउन ३० गते बिहिबार र गाईजात्रा मनाउन साउन ३१ गते शुक्रबार पोखराका निजी विद्यालयहरुले शिक्षा नियमावली अनुसार ५ दिने स्थानीय बिदामा कट्टी हुने गरि बिदा दिने भएका छन् । स्मरण रहोस् सरकारले जनैपूर्णिमा दिइँदै आएको सार्वजनिक बिदालाई यो वर्षदेखि हटाएको छ ।