पोखरा । पोखरा महानगरपालिकामा रहेको सहिद स्मारक आधारभूत विद्यालयको परिसरमा विश्व वातावरण दिवसको अवसरमा वृक्षरोपण गरिएको छ । गण्डकी प्रदेश सांसद सरस्वती गुरुङले विद्यालय परिसरमा फलफूलको बिरुवा रोप्दै प्लास्टिकजन्य प्रदूषणबाट उत्पन्न समस्याको दिगो समाधानका लागि दृढ संकल्प गर्ने समय आएको बताइन् ।

पोखरा ३० का वडा अध्यक्ष दुर्गा सुवेदीले विश्वमा वातावरण भयावह अवस्थामा रहेको र बोटबिरुवा रोपी वातावरण स्वच्छ राख्न स्थानीयलाई आग्रह गर्दै लेखनाथ केन्द्रित विकास अहिलेको आवश्यकता औंल्याइन् ।

विद्यालयका शिक्षक कृष्ण पौडेलले सञ्चालन गरेको कार्यक्रममा विद्यालय व्यवस्थापन समितिका अध्यक्ष प्रेम लिगलले वातावरणलाई व्यवस्थित गर्न विद्यालय नजिकै रहेको प्रदेश ट्राफिक कार्यालय अन्यन्त्र हटाइ त्यस ठाउँमा यातायात कार्यालयको स्थापनाका गर्न आग्रह गरे ।