पोखरा, १६ असार । गण्डकी प्रदेशका भौतिक योजना मन्त्री एवं सरकारका प्रवक्ता कुमार खड्काले यसपटक ढिलै भए पनि परिष्कृत बजेट आउने दाबी गरेका छन् ।

संसदीय पत्रकार मञ्च गण्डकीको आयोजना भएको दुईदिने संचार र सूचना प्रविधिको जानकारी एवं फोटो तथा भिडियो सम्बन्धी अभिमुखीकरण कार्यक्रमलाई बिहीवार सम्बोधन गर्दै उनले त्यस्तो बताएका हुन् । उनले बजेटमा केही त्रुटि भए पनि त्यसलाई सच्चाएर परिष्कृत ढङले बजेट ल्याइने दाबी पनि गरे । नीति तथा योजना आयोग र अर्थ मन्त्रालयबाट विषयगत मन्त्रालयलाई सिलिङ गएपछि सो सिलिङ अनुसारको बजेट निर्माण गर्ने काम सम्बन्धित मन्त्रालयको हो भन्दै उनले बाहिर आएको हल्ला जस्तो मन्त्री–मन्त्री र मुख्यमन्त्रीबीच कुनै विवाद नभई बजेटबारे बुझाइमा फरकमात्रै रहेको उनले स्पष्ट पारे ।
मन्त्री खड्काले संसदीय पत्रकार मञ्च स्थापनाकालदेखि नै आफ्नो सामीप्यता रहेको बताए । संसद्को प्रभावकारीता बढाउन मञ्चको भूमिका महत्वपूर्ण रहेको औल्याउँदै उनले अहिले पत्रकारिताको क्षेत्र बढेजस्तै पत्रकारितामा गम्भीरता पनि बढेको महसुस आफूले गरेको सुनाए ।

पत्रकारले न्यूजमात्रै दिने होइन भ्युज पनि पस्कनुपर्दछ भन्दै राजनीतिका सकारात्मक पक्षमा कलम चलाउन पनि सहभागी पत्रकारलाई आग्रह गरे ।

नेपाल पत्रकार महासंघ केन्द्रीय सदस्य सरिता तिमिल्सिना पगेनीले पत्रकारका कार्यक्रममा प्रदेश सरकारको सहयोग महत्वपूर्ण रहेको भन्दै कार्यक्रमको मर्म अनुसार पत्रकारले क्षमता विकास गर्नुपर्नेमा जोड दिइन् । उनले गण्डकी प्रदेश सरकारको बजेट कार्यान्वयन अव्यवहारिक रहेको तर्क पनि गरिन् ।

पत्रकार महासंघ गण्डकी महासचिव गोविन्द सुवेदीले कार्यक्रम समय सापेक्ष रहेको जनाउँदै प्रदेश सरकारलाई खर्च मापदण्ड खुकुलो बनाउन सुझाव दिए । खर्च मापदण्डमा कडाइ गर्दा कार्यक्रमका लागि बजेट परे पनि व्यावहारिक रुपमा कार्यक्रम कार्यान्वयमा जान नसक्ने उनको ठहर छ ।

मञ्चका कार्यवाहक अध्यक्ष अमृत सुवेदीले संस्था पत्रकारको क्षमता अभिवृद्धिका लागि कटिबद्ध रहेको सुनाए । उनले गण्डकी सरकारको खर्च मापदण्ड कार्यान्वयन चुनौतीपूर्ण छ भन्दै त्यसमा संशोधन गर्न सुझाव समेत दिए ।

अभिमुखीकरणअन्तर्गत संचार तथा सूचना प्रविधि सम्बन्धमा पत्रकार सुनिल पाण्डे, भिडियो पत्रकारिताबारे पत्रकारद्वय प्रदीप पौडेल र इन्द्रप्रसाद पौडेल, फोटो पत्रकारिताबारे फोटो पत्रकार राम गुरुङले सहजीकरण गरेका थिए । मञ्चका कार्यवाहक अध्यक्ष सुवेदीको अध्यक्षतामा सम्पन्न उक्त कार्यक्रम मञ्च सचिव रोहितराज पराजुलीले संचालन गरे ।