पोखरा । पोखराको फूलबारीमा निर्माणाधीन दिव्य शान्ति अनुभूति केन्द्रको १० प्रतिशत निर्माण सकिएको छ । कुल २५ करोड रुपैयाँ अनुमानित लागत रहेको सो केन्द्रको हाल पिल्लर उठाउने कार्य भइरहेको प्राविधिकले जनाएका छन् । निर्माणमा हालसम्म साढे २ करोड रुपैयाँ खर्च भइसकेको जनाइएको छ ।

ब्रम्हाकुमारी ईश्वरीय विश्वविद्यालयको पोखरा पिस रिट्रिट सेन्टरअन्तर्गत निर्माणाधीन सो केन्द्रमा ९ सय र ५ सय जना मानिस अट्ने २ छुट्टाछुट्टै राजयोग सभाहल, अनुभूति कक्ष र जीवन मूल्य संग्रहालय मुख्य आकर्षणका रुपमा रहने छन् ।

पोखरा–११, फूलबारीको शिवशक्तिमार्गमा संस्थाको स्वामित्वमा रहेको १ हजार ८ सय २२ वर्ग मिटर जग्गाको करिब आधाजसो जग्गा केन्द्रको भवनले ओगट्ने छ ।

केन्द्रले मानिसको जीवनशैली, आचरण, आहार, विहार, व्यवहार र सोचमा सकारात्मक परिवर्तन ल्याउनुका साथै पोखरामा पर्यटन प्रवद्र्धनमा नयाँ गन्तव्य थपिने विश्वास गरिएको छ । यसले सांस्कृतिक तथा आध्यात्मिक उन्नति गर्दै जो कोहीलाई पनि चरित्रवान् र शान्तिप्रिय बन्न प्रेरित गर्ने विश्वास छ ।