पोखरा । मानव मिलन संस्था पोखराले स्याङ्जाको फेदीखोला–४ आरुखर्क तल्लाचौरस्थित राम्चेदेवी आधारभूत विद्यालयका छात्रछात्रालाई शुक्रबार न्यानो कपडा वितरण गरेको छ ।

विद्यालय संस्थापक प्रअ तथा मानव मिलन स्याङ्जाका अध्यक्ष नारायणप्रसाद पौडेलले विद्यालय अध्यक्ष दिलबहादुर मिजारलाई स्वीटर, टोपीलगायत सामग्री हस्तान्तरण गरेका हुन् ।
प्रमुख अतिथि पौडेलले मानव मिलन सबै मानवको साझा संस्था भएको उल्लेख गर्दै जाडोको बेला न्यानो कपडाले बालबालिकाको स्वास्थ्य सुरक्षामा सघाउ पुग्ने बताए ।

ब्राम्हण समाज नेपालका अध्यक्ष डा नारायणप्रसाद अधिकारीले देशमा ठूला ठूला प्रतिभाहरु डाँडापाखामा जन्मिएको चर्चा गर्दै नेपालकेशरी मणिभद्रमुनि महाराजको जन्मस्थल भएकोले आरुखर्कवासीले गर्व गर्नुपर्ने बताए ।

स्वतन्त्र पत्रकार संघ नेपालका संस्थापक अध्यक्ष कृष्णप्रसाद बास्तोलाले गाउँका संकटग्रस्त विद्यालय बचाउन गाउँ समृद्ध बनाउनु पर्नेमा जोड दिए ।

मानव मिलन अन्तर्राष्ट्रिय महिला विभागकी सचिव सावित्री शर्माले डा. मणिभद्रमुनि महाराजको परिकल्पनाअनुसार संस्थाले राहत कार्यक्रम गर्दै आएको जानकारी दिइन् ।

कार्यक्रममा आरुखर्क पोखरा समाजका अध्यक्ष यामबहादुर पौडेल, मावन मिलन पोखराका निवर्तमान अध्यक्ष रेशमराज सुवेदी, संस्थापक अध्यक्ष कोमलबहादुर प्रजु, राम्चेदेवी आधारभूत विद्यालयका संस्थापक अध्यक्ष ढुण्डीराज पौडेलले मन्तव्य राखेका थिए ।

संस्थाका अध्यक्ष गुप्तप्रसाद शर्माको अध्यक्षतामा भएको उक्त कार्यक्रममा विद्यालयका प्रधानाध्यापक विन्दुकुमारी पौडेलले स्वागत गरेकी थिइन् ।

विद्यालय अध्यक्ष दिलबहादुर मिजारले धन्यवाद ज्ञापन गरेको कार्यक्रमको सञ्चालन संस्थाकी सचिव नम्रता बरालले गरेकी थिइन् । कार्यक्रम संयोजन संस्थाका सदस्य रामचन्द्र पौडेलले गरेका थिए ।