पोखरा । पोखरा महानगरपालिका वडा नं १५ को राती खहरेमा आकर्षक फुटबल ग्राउन्ड बन्दैछ ।
महानगरको १५ नं वडा कार्यलयले आफ्नो वडाभित्र पर्ने राती खहरेको सार्वजनिक (खाली) जग्गालाई खेलकुदको पूर्वाधारको रुपमा निर्माण गर्न लागेको हो । वडाको ठूली मजुवा टोलबाट दक्षिणतर्फको अतिक्रमित खाली जग्गामा वडाले खेलमैदानको संरचना बनाउन लागेको हो । ठूली मजुवा टोलबाट राती खहरे जाने बाटोको टुटुङ्गा (वायाँ) र ठूली मजुवाको फूलबारी रिसोर्ट (दायाँ) तर्फको ढिस्को बीचको खाली सार्वजनिक जग्गामा खेलकुद मैदान बन्ने भएको हो ।
पोखराको बजार क्षेत्र र पोखरा रंगशालादेखि नजिकै रहेको सो स्थानमा इलाभेन ए साइडकै फुल साइजको स्तरिय फुटबल खेल मैदान बनाउन लागिएको पोखरा–१५ का वडाध्यक्ष प्रकाश पौडेलले जानकारी दिए । उनले उत्कृष्ट र व्यवस्थित फुटबलमैत्री खेल मैदान बनाउन लागेको बताए ।
कास्की क्षेत्र नं २ का प्रदेशसभा सदस्य कृष्ण थापाले आव ०७६/०७७ को सांसद विकास कोषबाट उपलब्ध गराएको ५ लाखको बजेटबाट खेल मैदानको निर्माण कार्य शुरु गरिएको वडाध्यक्ष पौडेलले बताए । उनका अनुसार उक्त बजेटले हाल डोजर लगाउने र जमिन सम्याउनेसम्मको कार्य गरिएको पौडेलले उल्लेख गरे ।
बजेट अभावका कारण बाँकी काम अघि बढ्न नसकेको उनको भनाई छ । प्राविधिक ईञ्जीनीयरले खेल मैदानको लागि प्राविधिक मुल्यांकनको होमवर्क गरिरहेको वडाध्यक्ष पौडेलले सुनाए । उनका अनुसार करिब १ करोडसम्मको डीपीआर बन्दै छ ।
उक्त ठाउँमा उत्कृष्ट र स्तरिय खेल मैदान बनाउन खेलकुदसँग सरोकार राख्ने सरोकारवाला निकाय र स्थानीय सामाजिक संघसंस्थासँग वडाध्यक्ष पौडेलले याचनासमेत गरेका छन् ।
वडाध्यक्ष पौडेलले याचना गरेका छन्, ‘यहाँको प्राकृतिक वातावरणलाई जोगाउन पनि खेलकुद मैदान बनाउन लागेका हौं । यहाँका स्थानीयवासी, युवा क्लब, महानगरकै सामाजिक संघसंस्था, खेलकुदसँग सरोकार राख्ने खेलकुद विकास समिति, फुटबलको निकाय एन्फा लगायतका निकायहरुसँग स्तरिय खेल मैदान बनाउने हाम्रो अभियानमा जोडिन अभियन्तासँग साथ र सहयोगको याचना गर्दछु ।’
भौगोलिक, प्राकृतिक र हावापानीको हिसावले पनि उक्त ठाउँ खेलमैदान बन्न लायकको छ । उत्तर दक्षिण मोहडाको खाली जग्गा छ । उक्त स्थानमा चिसो पानीको मूल भएको राती खहरे खोला बगेको छ । खेलमैदानको दायाँवायाँ हरियाली वातावरण छ । सुन्दर, शान्त, स्वच्छ र मनमोहक वातावरण रहेको उक्त स्थानबाट सिधा माछापुच्छ«े हिमाल देखिन्छ । दक्षिणतर्फ सेती नदी सुसाएको सुनिन्छ । खेलाडीहरुका लागि उक्त ठाउँ एकदमै अनुकूलको छ ।
खेलकुद विज्ञ र पारखीहरुले पनि उक्त ठाउँ स्तरिय र उत्कृष्ट खेल मैदान बन्न सक्ने उपयुक्त स्थान रहेको सुझाव दिएका छन् । पोखरामा राष्ट्रिय तथा अन्तराष्ट्रिय खेलकुदका इभेन्टहरु हुँदा यस ठाउँलाई प्रशिक्षणका लागि ट्रेनिङ सेन्टरका रुपमा सदुपयोग गर्न सकिने खेलकुद विज्ञहरुको सुझाव छ ।
‘यस ठाउँमा खेलकुद मैदानको निर्माण कार्यलाई छिटो भन्दा छिटो पूरा गर्न सके यो पोखराकै रमणीय खेलकुद मैदान बन्नेछ,’ विज्ञहरुले सुझाव दिएका छन् ।
विश्वमै सुन्दर पोखरालाई खेलकुदको हवका रुपमा पनि लिने गरिन्छ । स्वयं पोखरा महानगरपालिकाले यस शहरलाई खेलकुद हवको रुपमा विकास र परिचय दिने प्रयास गरिरहेको बेला यो खेल मैदान निर्माण कार्य थाल्नुले पोखराको खेलकुदका लागि यो एउटा कोशेढुङ्गा बन्न सक्ने अनुमान लगाइएको छ ।
पोखरा महानगर–१५ भित्रको अतिक्रमित सार्वजनिक भूभागको संरक्षण र त्यस्ता भूभागलाई विकासको संरचनासँग जोड्ने महानगरकै १५ नं वडाको प्रयासस्वरुप यो खेलकुद मैदान बन्न लागेको हो । महानगरको सम्बन्धित वडा नं १५ ले यस खेल मैदानको निर्माण थालनी मात्र गरेको हो । खेलमैदानको निर्माणका लागि गर्नुपर्ने कामहरु धेरै बाँकी छन् ।
स्थानीय समाजसेवी बीरभद्र आचार्य लामो समय फुटबल क्षेत्रमा लागेका एक फुटबल अभियन्ता नै हुन् । सहारा क्लब पोखराका पूर्व अध्यक्ष समेत रहेका आचार्य आफ्नो वडाभित्र फुटबल ट्रेनिङ ग्राउन्ड बन्नलाग्दा खुशी देखिन्छन् । वडाभित्र स्तरिय खेलकुद मैदान बनाउने वडाको प्रयासलाई आचार्यले मुक्त कण्ठले प्रशंसा ब्यक्त गर्दछन् ।
खेलकुदलाई युवा वर्गसँग दाँज्ने गरिन्छ । स्वच्छ र स्वस्थ समाज निर्माणका लागि खेलकुद अपरिहार्य छ । शरीरलाई स्वस्थ, स्वच्छ र तन्दुरुस्ती राख्न युवाहरुका लागि खेलकुद झनै आवश्यक रहेको आचार्यले आफ्नो धारण राख्छन् । यस ठाउँमा बन्ने खेलकुद मैदानले यहाँका स्थानीय युवा वर्गका लागि कोशेढुङ्गा बन्ने आचार्यले बताए । राती खहरेमा एउटा आकर्षक फुटबल ट्रेनिङ खेल मैदान बनाउन सकिने आचार्यको धारणा छ ।
आचार्यले भने, ‘यहाँ फुल साइजको फुटबल मैदान बनाउन सकिन्छ । ९० बाई ५५ को फुटबल ग्राउन्ड सजिलै बन्छ । जग्गाको मोहडा उत्तर दक्षिण परेकोले फुटबल ग्राउन्डका लागि यो उपयुक्त स्थान हो । मैदानको शीरदेखि पुछारसम्म दर्शक प्यारापीट बनाउन सकिन्छ । मैदान बनाउन पोखरा महानगरपालिका लगायत खेलकुद विकास समितिदेखि लिएर एन्फा लगायतको सहयोग आवश्यक छ ।’
बन्दै गरेको फुटबल ग्राउन्डदेखि तल राती खहरेको फाँटमा नेपाल प्रहरीद्वारा गण्डकी प्रदेशस्तरिय वीरेन्द्र प्रहरी अस्पताल बनाउने योजना छ ।
तस्बीर : सुदर्शन रञ्जित
Related News
सम्बन्धित समाचार
मुख्यमन्त्री अधिकारीविरुद्धको रिट खारेज
कक्षा १२ को प्रश्नपत्र आउट गर्ने २ जना पक्राउ
गण्डकीका मुख्यमन्त्री विरुद्धको मुद्दामा बहस सकियो, आजै फैसला आउने
आठौं पोखरा स्पोर्टस् अवार्ड : वर्ष खेलाडी ह्याट्रिक दाउमा अरुणा
गण्डकीका ४ सय ६७ स्थानमा डढेलो
hero news full width
मुख्य समाचार
बझाङ प्रदेशसभा–१ मा एमालेका भण्डारी विजयी
अधिकारी सरकारको वैधताको टुंगो आज !
वैशाख १७, २०८१पोखराको मालेपाटनमा डिभाइडरमा ठोक्किएर कार दुर्घटना
वैशाख १७, २०८१बुटवल पावर कम्पनीले ल्यायो विद्युत् महसुल बढाउने प्रस्ताव
वैशाख १६, २०८१क्षत्री समाज नेपालमा पोखराका रिव, महासचिवमा कृष्ण
वैशाख १६, २०८१यस्तो छ लगानी सम्मेलनको कार्यतालिका
वैशाख १६, २०८१