देशमा फेरि एक पटक अघोषित किसिमको लोडसेडिङ छ । १७/१८ घण्टासम्म लोडसेडिङमा रहन अभ्यस्त देशवासीलाई २÷४ घण्टाको लोडसेडिङ असह्य हुने कुरा भएन । तैपनि सरकारले सकेसम्म धेरै बिजुली प्रयोग गर भनेर दिएको सन्देशको सन्दर्भमा सोच्दा यो विडम्बनाको कुरा मान्नुपर्ने हुन्छ । विद्युत््को इतिहास हेर्दा देशमा १ सय वर्षभन्दा पहिले नै बिजुली बलेको देखिन्छ । ८३ हजार मेगावाट विद्युत् क्षमता भएको देशमा १ सय वर्ष लगाएर पनि अहिले हामीलाई चाहिने २ हजार मेगावाट विद्युत् पनि निकाल्न सकेका छैनौं । तैपनि यस वर्ष हामीले केही विद्युत् भारतमा पठाएर केही अरब रुपैयाँ कमायौं । यो एक रेकर्ड हो । तर अहिले खडेरी परेको र भारतको सव–स्टेसनमा पनि खराबी आएकोले त्यहाँबाट बिजुली आयातमा कमी आएकोले लोडसेडिङ भएको जनाइएको छ ।

विद्युत््को महत्व मनन् गरेर धेरै किसिमबाट विद्युत्को उत्पादनमा सरकारले हात बढाएको छ । बैंक वैकल्पिक विद्युत्को नारा चर्को छ । देशमा हावाबाट पनि घामबाट पनि विद्युत् निकाल्ने काम भएको छ । त्यसरी विद्युत् उत्पादन गर्ने काममा निजी क्षेत्र पनि लागेको छ । ठूल्ठूला प्रोजेक्ट विदेशीले गर्दैछन् । सरकार आफैंले पनि केही गर्दैछ । तैपनि विद्युत्को उत्पादन आवश्यक मात्रामा भएको छैन । विद्युत्को अभावमा र त्यसको ब्यवस्थापनको अभावमा विद्युत्बाट चल्ने सवारी साधनहरु चल्न सकेका छैनन् । तिनीहरु लामो समयदेखि त्यसै प्रयोगहीन छन् । सोलारको उपकरणहरु त्यसै छन् भने त्यसबाट चल्ने बस आदि पनि त्यसै छन् । ती बसको एकताका तत्कालीन प्रधानमन्त्री केपी शर्मा ओलीले काठमाडौंमा तामझाम साथ उद्घाटन गरेका थिए । त्यसपछि तीमध्ये कुनै बस पनि चलेको देखिएन ।

हामीकहाँ जलस्रोतको अथाह सम्पदा छन् । पहिले एउटा नदीमा एक ठाउँमा मात्र बाँध बाँधेर विद्युत् निकाल्ने र कुलो लगेर सिंचाइ गरिन्थ्यो भने अहिले एउटै नदीमा धेरै ठाउँमा बाँध बाँधेर विद्युत् निकाल्ने गरिन्छ । जसबाट उत्पादन लागत धेरै कम हुन सक्छ । फेरि पहिले नदीबाट विद्युत् निकाल्ने गरिन्थ्यो भने अहिले नदीको पानी संकलन गरेर त्यसबाट विद्युत् निकाल्ने गरिन्छ । त्यस किसिमको जलाशययुक्त पानीबाट निकालिएको विद्युत् गुणस्तरीय मानिन्छ । जुन हिउँद र वर्षामा पनि धेरै उतारचढाउ हुँदैन । आरुघाटमा त्यस्तै योजना बनाउने सरकारको नीति छ । त्यसको लागि मुआब्जा वितरण गर्ने काम भइरहेको छ । सरकाले त्यो योजना आफैंले गरे भने त्यो एक नमुना योजना हुने र त्यसले यस क्षेत्रको काँचुली फेरिने अनुमान गरिएको छ । देशमा यस्ता धेरै प्रोजेक्ट छन्, जसको कार्यान्वयन भएको छैन । देशको समृद्धिको लागि तिनीहरुको छिटो कार्यान्वयन गरिनु आवश्यक छ ।