१. अहिले २० वर्षपछि स्थानीय तह निर्वाचनको पहिलो चरणको मतगणना सम्पन्न हुन गइरहेको छ। स्थानीय तहमा निर्वाचित जनप्रतिनिधिले आफ्नो कार्यभार सम्हालेको समाचार पनि आइरहेको छ। गाउँ सहरमा जताततै उत्साहको माहोल व्याप्त छ।

२. चुनाव समग्रमा शान्तिपूर्वक भएको छ। शान्तिपूर्वक चुनाव सम्पन्न भएकाले पनि अहिले उत्साहको वातावरण पर्याप्त भएको हो। त्यसको लागि सरकार र निर्वाचन आयोग धन्यवादका पात्र भएका छन्। पहिलो चरणको मतदान जसरी सम्पन्न भएको छ, त्यस्तै गरी दोस्रो चरणको मतदान पनि सम्पन्न हुनुपर्दछ।

३. निर्वाचन आयोगले यो चरणको मतदान शान्तिपूर्वक सम्पन्न गरे तापनि यसमा धेरै कमी कमजोरी देखिएका छन्। आयोगको कमी कमजोरीले धेरै मत बदर भएका छन्। मतदातालाई मत हाल्न कठिनाई भएको थियो। मतपत्र अनावश्यक ठूलो भएको व्यापक सिकायत थियो।

४. त्यसको साथै मतदाता शिक्षाको सर्वथा अभाव भएको सबैले महसुस गरेका थिए। निर्वाचन आयोग आफैले पनि त्यो कुरा स्वीकारेको खबर पनि आएको छ। मतदाता शिक्षाको अभावमा मतदाता मत दिन अल्मलिएको र कतै धेरै चुनाव चिन्ह्मा छाप हानेको कुरा पनि मतदाताले बताएका छन्।

५. मतदाता शिक्षा सामान्यता निर्वाचन आयोगले सिकाउने हो। तर यसमा राजनीतिक पार्टीरूले पनि भूमिका खेल्नुपर्दछ। आफ्नो पार्टीको मत नबिग्रियोस् भनी तथा सुरक्षित पार्नका लागि आफ्ना मतदातालाई सिकाउनुपर्दछ। पहिले-पहिले त्यस्तो गर्ने चलन थियो।

६. पहिलो चरणको चुनाव जे जस्तो भए तापनि अब दोस्रो चरणको मतदानमा देश गइरहेको छ। पहिलो चरणको मतदानमा भएको कमी कमजोरी दोस्रो चरणकोमा दोहोर्‍याउन दिनु भएन। भूल गर्नु मानवीय स्वभाव हो। तर त्यो दोहोर्‍याउनु भने उचित होइन।

७. दोस्रो चरणको मतदान तीन सातापछि हुन गइरहेको छ। यो दुर्इ तीन सातामा चाहेमा धेरै सुधार गर्न सकिन्छ। कमी कमजोरी हटाउन सकिन्छ। तर त्यो कमी कमजोरी हटाउने र सुधार गर्ने काम भने तुरुन्त थालनी गर्नुपर्दछ। निर्वाचन आयोग र राजनीतिक पार्टीरूले यसलाई महत्वका रूपमा लिनुपर्दछ। ताकि पहिलो चरणको निर्वाचनको बेला भएको गल्ती र कमी कमजोरी दोस्रो चरणको मतदानको बेला नदोहोरियोस्।