‘हाम्रो सानः हाम्रो मानः नेपाली टोपीलाई सम्मान’ भन्ने मूल नाराका साथ लियो क्लब अफ हेमजाको आयोजनामा बुधवार हेमजामा अन्तराष्ट्रिय ढाका टोपी दिवस मनाएको छ।

सो अवसरमा नेपाल भ्रमण वर्ष २०२० लाई स्वागत पनि गरियो।

त्यस्तै, स्थानीय प्रगतिचोकबाट सहभागीले टोपी लगाई सद्भाव र्याली निकालेका हुन्। र्याली मिलनचोक पुगेर कोणसभामा परिणत भयो। र्यालीमा अस्थायी प्रहरी चौकी हेमजाले सहजीकरण गरेको थियो।

कार्यक्रममा सामुदायिक सेवा केन्द्र हेमजाका अध्यक्ष विष्णु बास्तोलाले नेपाली टोपीले सगरमाथाको जस्तै विश्वमा नेपालीको शिर उच्च बनाएको बताइन्।

क्लब सचिव वीपीन पौडेलले स्वदेश तथा विदेशमा रहेका नेपालीले यो दिवसलाई सभ्य र भव्य रुपमा मनाउँदै आएको उल्लेख गरे।

क्लब कोषाध्यक्ष नीराजन अधिकारीले पर्यटन वर्ष सफल पार्न युवाले आ–आफ्नो ठाउँबाट सक्दो योगदान दिनुपर्नेमा जोड दिए।

कार्यक्रम संयोजक विश्वास त्रिपाठीले स्वागत गरी शुरु गरेको सो कार्यक्रममा ध्वजाको अभिवादन सविना तिमिल्सिना साथै लियो प्लेज अमृता थापाले वाचन गरेका थिए।

क्लब अध्यक्ष विकास त्रिपाठीको अध्यक्षतामा भएको उक्त कार्यक्रम द्वितीय उपाध्यक्ष विजय त्रिपाठीले सञ्चालन गरेका थिए।