कन्या क्याम्पस पोखराले २८ औं वार्षिकोत्सव विविध कार्यक्रम गरी मनाएको छ।

प्रमुख अतिथि गण्डकी प्रदेश प्रमुख अमिक शेरचनले प्राविधिक शिक्षा अहिलेको आवश्यकता भएको बताए। उनले कन्याहरुलाई मर्यादित शैक्षिक वातावरणमा उच्च शिक्षा हासिल गराउन क्याम्पसले महत्वपूर्ण भूमिका खेल्न सकेको बताए।

क्याम्पसको वार्षिक प्रतिवेदन प्रस्तुत गर्दै क्याम्पस प्रमुख सुरेशकुमार मानन्धरले क्याम्पसले गुणस्तर सुनिश्चितता प्रत्यायोजन प्रमाणपत्र प्राप्तिका लागि अन्तिम चरणमा पुगेको जानकारी दिए।

क्याम्पस संचालन समिति अध्यक्ष योगेन्द्र प्रधानको अध्यक्षतामा भएको कार्यक्रममा कालिका बहुमुखी क्याम्पसका क्याम्पस प्रमुख ज्योतिबाबु पौडेल, कन्या क्याम्पसका निवर्तमान क्याम्पस प्रमुख मेजरमान बज्राचार्य, प्राध्यापक संघका उपसभापति डा भूमिराज बस्ताकोटी, छात्रा कल्याण समितिका संयोजक ममता शाह, समाजसेवी भूपालजङ् कुँवर लगायतले बोलेका थिए।

वार्षिकोत्सव अवसरमा सप्ताहव्यापी खेलकुद कार्यक्रम पनि गरिएको सहायक क्याम्पस प्रमुख चित्रबहादुर श्रेष्ठले जानकारी दिए।

कार्यक्रममा विद्यार्थीले विभिन्न सांस्कृतिक प्रस्तुति राखेका थिए। मर्यादित शैक्षिक वातावरणमा कन्यालाई उच्च शिक्षा भन्ने नाराका साथ २०४८ सालमा क्याम्पस स्थापना भएको थियो। क्याम्पसमा बीबीएस, एमबीबीएस, बीए, बीएड पढाइ हुने गर्दछ।