पोखरा । भानुभक्त आवासीय मावि को ३८ औं वार्षिकोत्सव तथा अभिभावक दिवसको अवसरमा विद्यालयले आफ्ना विद्यार्थी, शिक्षक एवं अभिभावकहरुका लागि अभिप्रेरणात्मक कार्यक्रम सम्पन्न गरेको छ । पहिलो दिन फागुन ८ गते जीवनशैलीविज्ञ रमण भट्टराईद्वारा विद्यालयका कक्षा नर्सरी देखि कक्षा १२ का विद्यार्थीहरु तथा शिक्षक, शिक्षिकाहरुलाई विद्यालयको सभाहलमा फरक फरक सत्रमा शिक्षण सिकाइ क्रियाकलापलाई कसरी प्रभावकारी र दिगो बनाउन सकिन्छ भन्ने विषयमा प्रस्तुति गरे ।

दोस्रो दिन पोखरा प्रज्ञा प्रतिष्ठानको सभाहलमा आयोजित कार्यक्रममा जीवनशैली विज्ञ भट्टराईले शिक्षक, विद्यार्थी एवम् अभिभावकहरुलाई शिक्षाको आवश्यकता र महŒव, लक्ष्य निर्धारण र हासिल गर्ने उपाय, शिक्षामा अभिभावक तथा विद्यालयको भूमिका, संस्थाप्रति अभिभावकको भूमिका, विद्यार्थीहरुमा सूचना प्रविधिको प्रभाव जस्ता विषयहरुमा प्रशिक्षण एवं उत्प्रेरणा प्रदान गरे ।

कार्यक्रममा विद्यालयका व्यवस्थापन समितिका अध्यक्ष मोहन दवाडी, शिक्षक अभिभावक संघका अध्यक्ष तीर्थ देवकोटा, गण्डकी प्रज्ञा प्रतिष्ठानका सदस्य सचिव मनकुमार श्रष्ठको उपस्थिति थियो ।

उक्त कार्यक्रमको समापन गर्दै विद्यालयका संस्थापक प्रिन्सिपल दिनेशकुमार लामिछानेले विद्यालयलाई समग्र देशकै शैक्षिक इतिहासमा उत्कृष्ट पहिचान बनाउन सफल संस्थाको रुपमा स्थापित गराउन हालसम्म योगदान गर्ने सम्पूर्णमा आभार व्यक्त गरे ।

कार्यक्रमको सहजीकरण विद्यालयमा सहप्राचार्य ज्ञानेन्द्र पौडेलले गरेका थिए । हाल विद्यालयमा कक्षा नर्सरीदेखि कक्षा १२ सम्म करिब ५ सय विद्यार्थी अध्ययनरत छन् ।